Mu gihugu cya Zambia abakora akazi ko kwigurisha bakunze kwitwa ‘indaya’ ni bo bari gufasha Leta gukurikirana no guhiga abantu bashobora kuba baranduye coronavirus. Ibi bije nyuma yaho muri iki gihugu habonetse abantu bashya banduye mu Mujyi wa Nakonde uri ku mupaka uhana imbibi na Tanzania.
Minisitiri w’Ubuzima muri Zambia, Chitalu Chilufya, yavuze ko abantu 76 muri 85 bashya bamenyekanye ko banduye babonetse mu Mujyi wa Nakonde ari ‘indaya’ cyangwa abashoferi b’amakamyo. Yavuze ko indaya arizo zabafashije mu kubona amakuru bakeneye .
Minisitiri Chilufya yagize ati: “I bintu biracyifashe nabi muri Nakonde”. Yongeraho ko ari yo mpamvu Perezida Lungu yategetse ko umupaka uba ufunzwe. Nakonde ni umujyi ukunda kuba urimo amakamyo menshi ava muri Zambia andi yinjira ava muri Tanzania nk’uko umunyamakuru wa BBC i Lusaka abivuga.
Avuga ko abashoferi b’amakamyo bafatwa nk’abugarijwe cyane no kwandura iki cyorezo kuko bahagarara mu duce twinshi kandi bazwiho gukora imibonano mpuzabitsina n’abantu benshi.
Minisitiri Chillufya ati: “Bari [indaya] kudufasha cyane mu iperereza ryacu kandi ntabwo dushaka ko bakorerwa ivangura. Bari kudufasha gushakisha abakekwa ko banduye.” Hari umwe muri bo twabonye afite ibimenyetso atubwira umukiriya we utwara ikamyo wo mu kindi gihugu anaduha numero ye ya telephone. Twarayihamagaye batubwira ko uwo muntu arwaye Covid-19″.
Abayobozi bo mu karere ka Afurika y’iburasirazuba naho hagaragaye ko abashoferi batwara amakamyo bari mu bantu benshi bari kubonekaho iki cyorezo. Byatumye haganirwa uko bagikumira , mu Rwanda ho imibare yatangwaga na Minisiteri y’Ubuzima mu minsi ishize yagiye igaragaza ko umupaka wa Rusumo ucaho abashoferi bavuye Tanzania hari umubare munini w’abanduye Covid-19.
Ibi byatumye hafatwa icyemezo ko nta mushoferi wongera kwinjira mu Rwanda, ikamyo azanye yakirirwa ku mupaka n’undi mushoferi wo mu Rwanda akageza ibyo itwaye aho bigiye akayimugarurira.
Zambia imaze kugira abarwayi ba Covid-19 bagera kuri 267, abamaze guhitanwa n’iyi ndwara ni barindwi , naho abamaze gukira bakaba bagera 117 nk’uko imibare yo muri iki gihugu ibigaragaza.
