Kuri uyu wa Gatanu, ihuriro ry’abaforomo muri Zimbabwe ryatangaje ko abakozi b’ubuvuzi banze gufata inkingo za Covid-19, bavuga ko nta bisobanuro bifatika byerekana niba zirinda ubwoko bw’iyi virusi bwagaragaye muri Afurika yepfo.
Ku ya 18 Gashyantare, Zimbabwe yatangiye ibikorwa byo gukingira ikoresheje inkingo zakozwe n’ikigo Sinopharm cyo mu Bushinwa, iba igihugu cya mbere muri Afurika y’amajyepfo gikoresheje uru rukingo.
Ariko Enock Dongo, perezida w’ishyirahamwe ry’abaforomo muri Zimbabwe rigizwe n’abanyamuryango 12.000, yavuze ko “gufata urukingo biri hasi mu bakozi b’ubuzima” nk’uko tubikesha AFP.
Yakomeje agira ati “Nkuko ibintu bihagaze, abantu baraseta ibirenge. Twemeye kureka abanyamuryango bacu bagafata icyemezo niba bashaka gukingirwa cyangwa batabishaka”.
Uyu yakomeje avuga ko bakeneye kumenya ko uru rukingo rutekanye, ingaruka zarwo niba zihari ndetse niba rwabasha no kurinda ubwoko bushya bwa Covid-19 bwagaragaye muri Afurika y’Epfo.
Abakoze uru rukingo, bo bemeza ko rukingira Covid-19 ku rugero rwa 79%, ariko ko ubushobozi bwarwo kuri ubu bwoko bushya bwa coronavirus butarasobanuka neza.
Zimbabwe yakiriye inkingo 200,000 za Sinopharm nk’impano u Bushinwa bwemeye kuzakuba kabiri, ariko leta ikazishyura doses zigera kuri miliyoni 1,8.
Kurikira ibiganiro n’amavidewo binyura kuri Bwiza TV
