Abasirikare bakora mu nzego z’iperereza mu Burundi bagarutsweho mu rubanza rw’abantu 25 bashinjwa gukoragana Kayumba Nyamwasa.
Kuwa Gatatu tariki ya 2 Ukwakira 2019, abantu 25 baregwa gukorana n’imitwe y’iterabwoba mu guhungabanya umutekano w’u Rwanda, bagejejwe imbere y’Urukiko rwa gisirikare ruri i Nyamirambo mu Mujyi wa Kigali.
Umushinjacyaha muri uru rubanza, Maj. Dennis Rutonza ubwo yasomaga ibyo aba bantu bakekwaho, yavuze ko umwe mu baregwa, Rtd. Maj. Habib Mudathiru, ufatwa nk’uyoboye iri tsinda, yavuye muri Uganda aho yari yarahungiye akerekeza mu Burundi.
Avuga ko ku mupaka w’Uburundi n’abo bari kumwe bakiriwe n’abakuriye inzego z’iperereza mu gisirikare cy’icyo gihugu, barimo Colonel Ignace Sibonama ushinzwe iperereza rya gisirikare (Chief J2) na Major Bertin ushinzwe iperereza ryo hanze.
Aba basirikare b’Uburundi ngo bakomeje gufasha Mudathiru kuvugana na Gen. Kayumba, kumuha icumbi ndetse ko na nyuma bamuhaye intwaro bakamufasha kujya muri Congo-Kinshasa.
Ngo bagiye bacungiwe umutekano kuva ku mupaka wa Tanzania cyangwa bava i Bujumbura, bagera muri RDC, bikorwa n‘abitwa Maso, Soldat Cyuma, Renzaho na Kimweshi bo mu Burundi.
Aba kandi ngo bahawe imbunda zo mu bwoko bwa SMG 13, LMG 3, MMG 1 n’ibikarito bine by’amasasu ya SMG na sheni eshatu z’amasasu ya NMG.
Muri uru rubanza kandi harimo abaturage bane b’Uburundi barimo: Ndirahira Jean de Dieu, Nsengiyumva Janvier, Minani Jean na Nsabimana Jean Marie Vianney.
Ubushinjacyaha buvuga ko mu baregwa uko ari 25, abantu 14 bafashwe bavuze ko binjijwe muri P5 banyuze mu Burundi, umunani baturutse muri Uganda, babiri muri Kenya n’umwe muri Malawi.
Ku rundi ruhande, abaregwa ntibariregura ku byo ubushinjacyaha buvuga.
[penci_related_posts dis_pview=”no” dis_pdate=”no” title=”Izindi nkuru wasoma” background=”” border=”” thumbright=”no” number=”4″ style=”list” align=”none” withids=”” displayby=”recent_posts” orderby=”rand”]
Uru rubanza ruvugwamo aba basirikare b’Uburundi rurakomeza kuri uyu wa 3 Ukwakira 2019.
