Umutwe wa M23 wisubije agace ka Mambasa ko muri Teritwari ya Lubero, nyuma yo kukirukanama ihuriro ry’ingabo za Leta ya Repubulika Iharanira Demokarasi ya Congo.
Uyu mutwe wemeje ayo makuru biciye muri Lt. Col Willy Ngoma uvugira igisirikare cyawo.
Uyu musirikare mu butumwa buherekeje amashusho yashyize ku rubuga rwe rwa X yagize ati: “Intare ubwo zari Mambasa kuri iki gicamunsi. Nta santimetero n’imwe izigera itwarwa, yaba FARDC y’intege nke, yaba abasinzi b’abanya-Afurika y’Epfo, ibivume bya FDLR, abanywarumogi ba Wazalendo, abahezanguni ba FNDB cyangwa abacinyankoro b’abacanshuro.”
M23 yigaruriye Mambasa nyuma y’uko ingabo zayo zari ziyobowe na Lt Col Bahati ziyirukanyemo ihuriro ry’Ingabo za Leta.
Mu mpera z’icyumweru gishize ni bwo FARDC yari yigambye kwirukana inyeshyamba muri kariya gace.
