Intambara yo mu burasirazuba bwa DRC yahungabanyije ubucuruzi bwambukiranya imipaka n’u Burundi

Mu gihe amakimbirane akomeje kwiyongera mu burasirazuba bwa Repubulika ya Demokarasi ya Congo (DRC), ubucuruzi bwambukiranya imipaka hagati y’iki gihugu n’u Burundi bugenda burushaho kuzamba. Ubucuruzi bwari bumaze gutera imbere, ubu bubangamiwe n’umutekano muke, bikabangamira ubukungu bwaho ndetse n’imibereho y’abacuruzi.

Kuva muri Mutarama na Gashyantare 2025, intambara mu burasirazuba bwa Repubulika ya Demokarasi ya Congo (DRC) yahungabanije cyane ubucuruzi bwambukiranya imipaka hagati ya Repubulika ya Demokarasi ya Congo n’u Burundi. Mu guhangana n’ihohoterwa n’umutekano muke, abacuruzi baturuka mu bihugu byombi ngo ntiboroherwa no kwambuka umupaka no gutwara ibicuruzwa byabo.

Ubucuruzi bukomeye bwangiritse

Ubusanzwe, umubano w’ubucuruzi hagati y’u Burundi na DRC ushingiye ku bicuruzwa byinshi. Abacuruzi bo mu Burundi batumiza cyane ibitenge bya Congo, bakajyana ibinyobwa, cyane cyane byeri, muri DRC. Ku ruhande rwabo, abacuruzi bo muri Congo barangura ibiribwa by’ingenzi mu Burundi nkuko iyi nkuru dukesha SOS Médias Burundi ivuga.

Isoko rikomeye ku bukungu bw’u Burundi

Imibare yavuye mu Kigo cy’imisoro cy’u Burundi (OBR) yerekana akamaro k’ubucuruzi bwambukiranya imipaka hagati y’ibihugu byombi. Mu gihembwe cya kane cya 2023, DRC yari yihariye ibice birenga 89% by’ibicuruzwa u Burundi bwohereza muri Afurika yo hagati.