Abapolisi n’ingabo z’u Rwanda bari mu butumwa bw’Umuryango w’Abibumbye bwo kubungabunga amahoro muri Repubulika ya Santrafurika (MINUSCA) na Sudani y’Epfo (UNMISS), ku wa Mbere tariki ya 7 Mata, bafatanyije n’abandi banyarwanda, abakozi b’Umuryango w’Abibumbye bakomoka mu bindi bihugu n’isi yose, kwibuka ku nshuro ya 31, Jenoside yakorewe Abatutsi mu 1994.Ni ibikorwa byo kwibuka byabereye mu bice bitandukanye bakoreramo, byaranzwe n’urugendo rwo kwibuka, gufata umunota wo kwibuka no gucana urumuri rw’icyizere mu rwego rwo kunamira inzirakarengane zirenga miliyoni zavukijwe ubuzima muri Jenoside yakorewe Abatutsi mu gihe cy’iminsi 100 gusa mu myaka 31 ishize.
Muri Sudani y’Epfo, ibikorwa byo kwibuka byabereye ahitwa Durupi, mu murwa mukuru w’icyo gihugu, Juba, ahakorera abapolisi b’u Rwanda bagize itsinda RWAFPU3 no mu mujyi wa Malakal uherereye mu Ntara ya Upper Nile, ahakorera abapolisi bagize itsinda RWAFPU1.
Muri Repubulika ya Santrafurika, ibikorwa byo kwibuka byabereye mu bice bitandukanye by’igihugu birimo umurwa mukuru Bangui, hakorera abapolisi bagize amatsinda RWAFPU1 na RWAPSU, ahitwa Kaga Bandoro mu Ntara ya Mbomou mu majyaruguru y’igihugu, hakorera abapolisi bagize itsinda RWAFPU2 no mu mujyi wa Bangassou uhererereye mu Majyepfo y’Iburasirazuba bw’igihugu, ahakorera itsinda RWAFPU3.
