Amafoto: Imbonerakure zagize intere bamwe mu barwanya ubutegetsi mu Burundi

Ku wa Gatandatu w’icyumweru gishize, ubuyobozi bw’ishyaka riharanira ukwishyira ukizana, CNL, bwatangaje ko abayobozi 23 bo mu gace ko mu Murwa Mukuru Bujumbura ririya shyaka rifitemo abayoboke benshi, batawe muri yombi bikozwe na Polisi ndetse nk’Imbonerakure.

CNL yatanze Agathon Rwasa usanzwe ari umuyobozi wayo, nk’umukandida ugomba kuyihagararira mu matora y’umukuru w’igihugu.

Amakuru y’itabwa muri yombi ry’abarwanashyaka ba CNL, yemejwe na Therence Manirambona usanzwe ari umuvugizi wayo, mu kiganiro yagiranye n’ibiro ntaramakuru by’Abafaransa AFP.

Ati” Nyuma y’igitero gikomeye cyagabwe mu rusisiro rwa Kanyosha ku wa Gatatu, hanakurikiyeho itabwa muri yombi ry’abayobozi ba CNL mu duce twa Isale na Mubimbi.”

Yongeyeho ati” Abantu 23 ni bo bamaze gutabwa muri yombi na Polisi ndetse nk’imbonerakure.”

Amafoto yiriwe acicikana ku munsi w’ejo, yerekana abatawe muri yombi bakubiswe bagizwe intere, bamwe bakandagiwe nk’imbonerakure abandi babyimbye ibice bitandukanye by’umubiri.
Apapolisi b’u Burundi bagaragara hafi aho barebera uko abasivili bahohotera abandi.

Manirambona yanabwiye AFP ko ku wa Kane w’icyumweru gishize umwe mu batawe muri yombi yakubiswe kugeza avuyemo umwuka, yemwe n’umuryango we ntIwashyikirizwa umurambo we.

Léonidas Ntirandekura, Umuyobozi mu gace ka Mubimbi, yabwiye AFP ko nta wufunzwe kubera impamvu za politiki mu bo CNL ivuga, ndetse n’uwo bivugwa ko yakubiswe kugeza apfuye yazize uburwayi.

Ati” Ntawe ufungiwe impamvu za politiki, bafungiwe kwica amategeko. Uwapfuye yazize uburwayi kandi twari twamujyanye kwa muganga. Ntabwo yigeze akubitwa nk’uko CNL ibivuga.”

Mbere y’uko bariya bantu bo muri CNL batabwa muri yombi, hari ubutumwa bwari bwacicikanye mu matsinda ya WhatsApp ya CNDD-FDDD avuga ko abarwanyi 120 ba CNL hari ibitero bari kugaba ahitwa Kanyosha ku wa gatatu w’icyumweru gushize.

Abatuye muri kariya gace babwiye AFP ko bumvise Urufaya rw’amasasu, umuyobozi muri kariya gace we akavuga ko imvururu zatewe n’ibisambo bitandatu byari bigiye kwiba ihene.

Umuvugizi wa CNL avuga ko hari abarwanashyaka babo batandatu bamaze kwicwa, mu gihe abandi benshi bari mu magereza.

Ati” Twamaganye iri toteza rikomeje gukorwa na Guverinoma mbere y’amatora y’umukuru w’igihugu yo muri Gicurasi 2020.

Mangingo aya Ishyaka CNL ritangaza ko rimaze kubura turabarura abarwanashyaka batandatu bamaze kwicwa, abandi bakorewe iyicarubozo baburirwa irengero. Abarenga 200 bari mu magereza mu gihe ibiro birenga 100 byangijwe bikanasenywa.