Igisirikare cya Repubulika Iharanira Demokarasi ya Congo (FARDC) cyataye muri yombi Col. Masamba Marc wari umuyobozi wungirije w’umutwe w’inyeshyamba za FLN zishamikiye ku mpuzamashyaka MRCD. Amakuru avuga ko Col. Masamba yafatanwe n’abandi barwanyi babarirwa muri 30. Amakuru agera kuri Bwiza.com avuga ko ziriya zafashwe nyuma yo kugwa mu gico cya FARDC zigerageza kwinjira mu Burundi. Imirwano hagati ya FARDC na FLN yatangiye mu rukerera rw’itariki ya 01 Werurwe, imara amasaha abarirwa muri abiri. Iyi mirwano yabeye muri Teritwari ya Fizi muri Repubulika iharanira Demokarasi ya Congo yaguyemo abarwanyi 15 ba FLN, nk’uko byatangajwe n’ibitangazamakuru byo muri Congo-Kinshasa. Ni amakuru yemejwe kandi na Capt. Dieudonné Kasereka usanzwe ari umuvugizi wa FARDC muri Kivu y’Amajyepfo. Uyu yavuze ko bamenye amakuru y’uko inyeshyamba za FLN zavaga mu ishyamba rya Hewa Bola zishakisha inzira izerekeza i Burundi. Ngo bazitegeye ahitwa Remera kuko ari ho zagombaga kuva zambuka i Ruzizi. U Rwanda rwagize icyo ruvuga kuri aya makuru Amb. Olivier Nduhungirehe usanzwe ari Umunyamabanga wa Leta muri Minisiteri y’ububanyi n’amahanga ushinzwe EAC, abinyujije kuri Twitter yagize ati” Akazi nigakomeze. Col. Masamba Marc, Umugaba w’Ingabo Wungirije wa FLN muri Kivu y’Amajyepfo yafashwe na FARDC. Umutwe w’iterabwoba uyobowe na Twagiramungu Faustin na Paul Rusesabagina, washegeshwe bikomeye n’igisirikare cya RDC mu mwaka ushize.’’ Col. Masamba ni muntu ki? Col. Masamba Marc yavukiye mu Ntara y’Amajyepfo , yinjira muri ALIR yaje guhinduka FDLR ahagana mu wa 1997. Yagiye ashingwa imirimo itandukanye muri FDLR mbere y’uko muri 2016 ahabwa inshingano zo kuba ushinzwe ibikoresho muri FLN. Kuva muri 2018 kugeza ubwo yafatwaga Col. Masamba Marc yari Umuyobozi wungirije w’agace k’imirwano ka Kivu y’amajyepfo akaba yari yungirije Gen.Hakizimana Antoine Jeva.
