Indwara ya Coronavirus (COVID-19) imaze kuzahahaza Isi kuva yakwibasira Ubushinwa mu Mpera z’umwaka wa 2019, mu gace ka Wuhan mu Ntara ya Hubei. Iyi ndwara yagiye ikwirakwira ku Isi binyuze mu kuyanduzanya hagati y’abantu. Kuri ubu nta mugabane wo ku Isi iyi ndwara itarageraho. Dore uko imibare ihagaze kugeza ubu nk’uko ibitangazamakuru mpuzamahanga bibitangaza ndetse bikemezwa n’Ishami ry’Umuryango w’Abibumbye ryita ku Buzima ku Isi (WHO/OMS). Imibare igaragaza ko Coronavirus imaze kwica abantu 3831 ku isi hose n’aho abo ikekwaho bageze kuri 110,098 abayikize bo ni 62,302. Mu Bushinwa abayikekwaho ni 80,738 abo imaze kwivugana ni 3,120 n’aho abayikize ni 58,624 bukurikiwe n’Ubutaliyani bufite abayikekwaho 7,375 impfu zayo ni 366 mu gihe abayikize ari 622, Iran ku rutonde ni iya 3 aho yapfushije 194 ikaba ifite abayikekwaho 6,566 abayikize ni 2,134. N’ubwo bimeze bityo, Umugabane wa Afurika uracyari hasi n’umubare w’abanduye Coronavirus gusa n’aho yamaze kwivugana umuntu mu gihugu cya Misiri. Misiri ifite abakekwaho iyi virusi 55 ikaba kandi yaramaze kwivugana umuntu 1 n’aho undi 1 yakize iyi virusi. Algeria ifite abantu 20 bakekwaho iyi virusi nta n’umwe uratangazwa ko yakuwe mu kato ni mu gihe Senegal ifite 4 bayikekwaho n’umuntu 1 wakuwe mu kato k’iyi virusi. Ibindi bihugu ni nka Tunisia ifite abakekwa 2 na Togo ifite umuntu 1 ukekwaho virusi ya Corona. Ibimenyetso bya Coronavirus Coronavirus yandura iyo umuntu yitsamuye cyangwa akoroye yegereye undi; iyo umuntu afite ibiganza byandujwe, gukora cyangwa gusuhuza muntu wayanduye no gukora ku kintu cyangwa ahantu hari iyo virusi. Ibimenyetso by’indwara ya Coronavirus birimo kugira umuriro, gukorora no guhumeka nabi ndetse ishobora no kugera aho itera umusonga no kubuza impyiko gukora bishobora gutera urupfu. Soma: https://bwiza.com/?Imibare-igaragaza-uko-Coronavirus-ihagaze-ku-Isi Kugeza ubu harabarurwa abantu ibihumbi bitatu maganinani na mirongo itatu n’umwe bamaze guhitanwa n’indwara ya Coronavirus ku Isi yose. Icyitonderwa : Aya makuru aboneka ku rubuga Worldometer gusa agenda ahindagurika.
Uko imibare ku ndwara ya Coronavirus ihagaze kugeza ubu ku Isi
