Leta ya Gambia kuwa Gatanu yashakishaga uruhindu abantu 14 bari barashyizwe mu kato muri hoteli nk’uko byatangajwe n’inzego z’ubuzima z’iki gihugu.
Minisitiri w’Ubuzima, Ahmadou Lamin Samateh yavuze ko abatorotse ari bamwe mu itsinda ry’abagenzi bari baturutse mu Bwongereza bakaba bari mu kato muri hoteli mu murwa mukuru Banjul.Yagize ati”Bamwe mu bagenzi bari mu kato bishe imiryango ya hoteli baratoroka.”
Ku wa Kabiri ubwo Perezida Adama Barrow yashyiragaho amabwiriza yo gushyira mu kato abagenzi baturutse mu mahanga no gufunga amashuri ni bwo umurwayi wa mbere wa Coronavirus yagaragaye akaba yari umugore na we waje aturutse mu gihugu cy’Ubwongereza.
Umuyobozi mukuru mu biro bya Minisiteri y’Ubuzima, Modou Njie yabwiye AFP ko aba 14 batorotse bagishakishwa ngo hamenyekane ubwenegihugu bwa bo.
Gambia ubu irabarura umuntu umwe ufite Coronavirus mu gihe abo batorotse hatari hamenyekana ibisubizo by’ibizamini bya bo ni mu gihe ku mugabane w’Afurika abasaga 992 basanganywe iyi virus naho 26 bakaba bamaze guhitanwa na yo.
