Imirwano hagati ya Zambia na Repubulika ya Demokarasi ya Kongo imaze icyumweru aho ibihugu byombi birwanira ubutaka buri hafi n’umupaka uhuza ibi bihugu mu gace kitwa Kibanwa.
Uru rugamba rwasembuwe no kuba ingabo za Zambia zarinjiye ku butaka bwa Kongo muri aka gace kitwa Kibanwa hafi n’ikiyaga cya Tanganyika.
Ibiro Ntaramakuru by’Abafaransa AFP byatangaje ko mu ijoro ryo ku Cyumweru kuwa 15 Werurwe 2020 rishyira kuwa Mbere habaye imirwano ikomeye hagati y’ingabo z’ibihugu byombi aho buri ruhande rwatakaje umusilikare umwe aguye muri iyo mirwano bikarangira ingabo za Zambia zishinze idarapo ry’igihugu cyazo kuri ubu butaka zikamanura irya Kongo.
RFI ikomeza ivuga ko izi ngabo za Zambia zakomeje kugenzura ubu butaka kugeza kuwa Gatanu wo kuwa 20 Werurwe 2020.
Urubuga rwa Radiyo na Televiziyo y’Ababiligi ‘rtbf.be’ rwo ruvuga ko muri iyi mirwano ingabo za DR Congo zabashije kugaruza aka karere ka Kibanwa kari kamaze kwigarurirwa n’ingabo za Zambia zikongera kumanika idarapo ry’igihugu cyazo kuri ubu butaka.
Ubu butaka bw’akarere ka Kibanwa gaherereye mu ntara ya Tanganyika bwakunze gukurura amakimbirane hagati ya Repubulika ya Demokarasi ya Kongo na Zambia ni ku mupaka wa Kibanga uhuza ibihugu byombi.
