Imibare y’urubuga Worldometers yerekana isegonda ku rindi uko icyorezo cya COVID-19 cyifashe ku Isi, yerekana ko mu gitondo cyo kuri uyu wa 31 Werurwe iki cyorezo kimaze kwandurwa n’abarenga ibihumbi 785 hirya no hino ku Isi. Abantu bo mu bihugu 199 hirya no hino ku Isi ni bo bamaze kwandura kiriya cyorezo. Mu gitondo cyo kuri iyi tariki ya 31 Werurwe abari bamaze kwandura COVID-19 ni 785,807 ku Isi, mu gihe abo yari imaze guhitana ari 37,820. Abantu 165,659 ni bo bari bamaze gukira kiriya cyorezo, mu gihe abakikirwaye ari 582,328. Abantu 552,840 bangana na 95% by’abarwaye Coronavirus barwaye byoroheje, mu gihe 29,488 bangana na 5% by’abayirwaye barembye cyane. Leta Zunze ubumwe za America zifite abarenga 164,000 bamaze kwandura icyorezo cya Virusi ya Corona, mu gihe Ubutaliyani bufite abarenga 11,591 imaze kwica. Muri Espagne icyorezo cya Virusi ya Corona kimaze kwandurwa n’abakabakaba 88,000; mu gihe abo kimaze kwica ari 7,716. Imibare ya Minisiteri y’Ubuzima yerekana ko mu Rwanda abamaze kwandura COVID-19 ari 70 gusa nta n’umwe muri bo kiriya cyorezo cyari cyahitana. Icyitonderwa: Iyi mibare irahindagurika
