Polisi ya Uganda yatangaje ko yataye muri yombi Umunyarwandakazi Sandra Teta, imukekaho gukomeretsa ku bushake umugabo we akanaba n’umuhanzi Douglas Mayanja ‘Weasel’.
Sandra Teta afungiye mu gace ka Kabalagala.
Uyu mugore yatawe muri yombi mu gihe hari amakuru avuga ko yagonze Weasel ku bushake akamuvuna amaguru yombi, nyuma yo gushwanira mu gace ka Munyonyo.
Umuvugizi wa Polisi ya Uganda muri Kampala, Luke Owoyesigyire, yavuze ko Sandra Teta aregwa kugonga Weasel akoresheje imodoka ifite plaque no UBH148Y.
Iyi modoka yahise ifatwa, kuri ubu ikaba iri kuri sitasiyo ya Polisi ya Kabalagala.
Umuhanzi Weasel kuri ubu ari kuvurirwa ku bitaro bya Nsambya, aho yagejejwe nyuma yo kujyanwa igitaraganya mu bitaro byitwa Mukwaya Hospital.
Polisi ya Uganda ivuga ko yamaze gutangira iperereza mu rwego rwo kumenya icyatumye Teta agonga umugabo we.
