Dolors Sala, umubyeyi w’Umunya-Espagne Pep Guardiola utoza ikipe ya Manchester City, yitabye Imana kuri uyu wa 06 Mata azize icyorezo cya Virusi ya Corona.
Ni amakuru yemejwe n’ikipe ya Manchester City ibinyujije ku mbuga nkoranyambaga zayo.
Manchester City yagize iti” Buri wese ufite aho ahuriye n’ikipe yihanganishije Pep Guardiola n’umuryango we muri ibi bihe bibabaje cyane n’incuti zabo.”
Dalas yitabye Imana afite imyaka 82 y’amavuko.
Yaguye mu gihugu cya Espagne kimaze gupfiramo abantu 13,055 bazize icyorezo cya Virusi ya Corona.
Umujyi wa Barcelone yari atuyemo ni kamwe mu duce twugarijwe cyane kiriya cyorezo.
Mu kwezi gushize Guardiola yari yatanze inkunga ya miliyoni imwe y’ama-Euro, yo gufasha guhangana na kiriya cyorezo.
Aya mafaranga yakoreshejwe hagurwa imiti n’ibikoresho bifasha abaganga kwirinda kiriya cyorezo.
Mu bantu ku giti cyabo n’ibigo byihanganishije Guardiola harimo ikipe ya Manchester United.
Iyi kipe ibinyujije kuri Twitter yavuze ko yabababajwe no kumva inkuru y’urupfu rw’umubyeyi wa Guardiola, iboneraho kumwihanganisha.
Abakinnyi batandukanye biganjemo aba FC Barcelone na Manchester City na bo batambukije ubutumwa bumufata mu mugongo uriya mutoza w’imyaka 49 y’amavuko.
