Guverinoma y’u Burundi yongeye gufungura imipaka y’iki gihugu ku makamyo atwara ibicuruzwa aturutse mu Rwanda no muri Repubulika iharanira Demokarasi ya Congo, nyuma y’ibyumweru bibiri iki gihugu cyarayifunze ku mpamvu zari ziswe izo gukumira ikwirakwira ry’icyorezo cya Virusi ya Corona.
Ku wa 30 Werurwe ni bwo u Burundi bwari bwahagaritse amakamyo atwara ibicuruzwa by’ibihugu byo mu karere ka Afurika y’Iburasirazuba yahinjiraga aturutse mu Rwanda.
Ni amakamyo atwaye ibicuruzwa byiganjemo ibyabaga bivanwe ku cyambu cya Mombasa, muri Kenya.
Ibi byatumye u Rwanda rwandikira ibihugu bya Kenya na Uganda rubimenyesha icyemezo u Burundi bwari bwafashe, cyatumye u na rwo rufata icyemezo cyo kutongera kwemera ko amakamyo ajyanye imizigo mu Burundi aca ku butaka bwarwo.
U Rwanda rwamenyesheje Uganda na Kenya ibyari byabaye, nyuma y’uko amakamyo menshi yari aparitse ku mupaka warwo n’u Burundi ndetse no ku butaka butagira nyirabwo hagati y’ibihugu byombi, nyuma yo kwangirwa kwinjira.
Amakamyo yinjiraga muri iki gihugu aturutse muri Tanzania yo yari akinjira nk’uko bisanzwe.
Mu ijoro ryakeye ryo ku cyumweru ni bwo Guverinoma y’u Burundi yatangaje ko amakamyo yemerewe gutambuka, isaba abashoferi kubahiriza amabwiriza yo kwirinda Coronavirus yashyizweho.
Leta y’u Burundi mu itangazo yasohoye yagize iti”n’ubwo imipaka yo mu majyaruguru n’iburengerazuba y’u Rwanda na RD Congo ifunzwe, urujya n’uruza rw’ibicuruzwa ruracyemewe. Abashoferi b’amakamyo barasabwa kubahiriza ingamba zafashwe zo kurwanya ikwirakwira rya COVID-19.”
Aya makuru yanemejwe n’ihuriro ry’amashyirahamwe yohereza ibicuruzwa muri Afurika y’Iburasirazuba, mu itangazo ryasohoye kuri uyu wa mbere rigira riti” Ubu imipaka yose irafunguye. Amakamyo atwara ibicuruzwa azakomeza kugenda nk’uko amabwiriza ya EAC abiteganya.”
U Burundi bwari bwafunze iriya mipaka, nyuma gato y’uko inama yahuje abaminisitiri b’ubuzima mu karere n’ab’ibikorwa by’umuryango wa Afurika y’Iburasirazuba, bari bafashe ibyemezo birimo kwemerera amakamyo atwaye ibicuruzwa gutambuka nta nkomyi, mu rwego rwo kwemerera ubucuruzi gukomeza gukorwa muri iki gihe ibihugu byugarijwe na Coronavirus.
Kuba u Burundi bwari bwishe ibikubiye mu byemezo byari byafatiwe muri iriya nama, byari byatangiye kugira ingaruka mbi ku bucuruzi bwo mu karere, ku buryo ibihugu bimwe byari byatangiye kwikoma ibindi bibishinja kubangamira ubucuruzi bwabyo.
