Abba Kyari wari ukuriye abakozi kwa Perezida Muhammadu Buhari wa Nigeria akaba n’umwe mu Bajyanama be ba hafi, yitabye Imana azize icyorezo cya Coronavirus.
Amakuru y’urupfu rwe yemejwe na Perezidansi ya Nigeria, mu itangazo yasohoye kuri uyu wa gatandatu igira iti” Tubabajwe no kubika urupfu rwa Abba Kyari” wabaye umuzamu wa Perezida w’igihugu gituwe kurusha ibindi muri Afurika. “Nyakwigendera bari bamusanzemo icyorezo cya Coronavirus kandi yari ari guhabwa ubuvuzi. Gusa yitabye Imana ku wa gatanu, itariki ya 17 Mata 2020. Roho ye iruhukire mu mahoro.” Kyari w’imyaka 77 y’amavuko, abaye umuntu wa mbere ukomeye muri Nigeria wishwe na Coronavirus imaze kwandurwa n’abantu 493 muri kiriya gihugu, mu gihe abo kimaze kwica ari 17. Imibare ya kaminuza ya Johns Hopkins igaragaza ko Coronavirus imaze guhitana abantu barenga 1000 muri Afurika, kuva iki icyorezo cyaduka mu mpera z’umwaka ushize. Abacyanduye kuri uyu mugabane bagera ku bihumbi 17. Imibare yakozwe ku wa gatanu, yerekana ko Algeria ifite umubare munini w’abantu bapfuye bagera kuri 364, ikurikirwa na Misiri ifite 205, Maroc 135 na Afurika y’Epfo 50.
