RDC: Perezida Tshisekedi yirukanye Gen. Kampete wari ukuriye abamurinda

Mu Ukwakira umwaka ushize byari byavuzwe ko uyu mugabo yari yirukanwe ashinjwa kugira uruhare mu ihanurwa ry’indege Antonov 72 yari itwaye ibikoresho bya Perezida Tshisekedi, gusa biza kugaragara ko atari inkuru y’impamo.

Kampete uyu yari amaze igihe ari mu bihano yafatiwe n’imuryango w’ubumwe bw’Uburayi, ashinjwa kugira uruhare mu bikorwa bihonyoza uburenganzira bwa muntu.

Perezida Tshisekedi kandi yinjije Ephraime Kabi Kiriza, mu buyobozi bukuru bw’ingabo za Congo, amugira umugaba w’ingabo zirinda umukuru w’igihugu. Ni nyuma yo kumuzamura mu ntera amuvana ku ipeti rya Colonel akamugira Gen. de Brigade.

Gen. de Brigade Jerôme Chico Tshitambwe we yagizwe umugaba wungirije ushinzwe ibikorwa byihariye n’ubutasi mu mutwe w’abarinda Tshisekedi.

Perezida Félix Tshisekedi yakoze impinduka mu buyobozi bw’ingabo zimurinda mu gihe hamaze iminsi havugwa ibibazo mu biro bye. Ni ibyatumye Vital Kamerhe wari umuyobozi wabyo akaba n’umujyanama wa Tshisekedi atabwa muri yombi azira kunyereza amafaranga ya gahunda yihutirwa y’umukuru w’igihugu, ubu akaba afungiye muri gereza nkuru ya Makala i Kinshasa.