Minisports yamaganye icyemezo cyafashwe n’amakipe arimo Rayon Sports

Amakuru avuga ko hari n’andi makipe arindwi yafashe icyo cyemezo, atarimo Gasogi United, Marines FC, AS Kigali, Police FC na APR FC.

“Kudahagarika amasezerano y’abakozi bakora mu mashyirahamwe (y’imikino agengwa na Minisports) hitwajwe Covid-19″, ni umwe mu myanzuro yafatiwe mu nama yahuje Minisiteri ya Siporo n’abayobozi b’amashyirahamwe y’imikino itandukanye mu Rwanda, ku wa 06 Mata 2020.

Iyi Minisiteri ivuga ko kudahagarika ayo masezerano biri mu kurengera inyungu z’abatunzwe na Siporo, iboneraho gusaba amakipe ko nta yemerewe guhagarika amasezerano y’abakinnyi, abatoza n’abandi bakozi bayo.

Ku bijyanye n’impungenge z’ubukene amakipe yari yashingiyeho mu guhagarika imishahara y’abakinnyi, Minisitiri Aurore Mimosa Munyangaju uyiyobora, yasabye amashyirahamwe y’imikino kwita ku banyamuryango bayo.

Minisitiri Munyangaju yagize ati”Tuributsa ko ari inshingano za Federasiyo ku kwita ku mibereho y’abanyamuryango bayo.”

Magingo aya imikino mu Rwanda imaze igihe yarahagaze kubera kwirinda ikwirakwira ry’icyorezo cya Coronavirus. Minisiteri ivuga ko mu gihe hataraboneka amabwiriza yo gusubukura imikino, Komite Olempike ikwiye kureba uburyo imikino yazasubukurwamo.