Umuryango wa Afurika Yunze Ubumwe watangaje ko uri kuvugana na Leta ya Madagascar ushaka kubona amakuru ya gihanga ngo upime niba uyu muti ntacyo utwaye kandi uvura coronavirus nk’uko bitangazwa. Uyu muryango uvuga ko nubona amakuru arambuye ibigo byawo byo gukumira no kurwanya ibyorezo (Africa CDC) bizayasuzuma bikareba niba uyu muti wiswe Covid Organics uvura. BBC ivuga ko mu itangazo uyu muryango washyize hanze, ngo iri suzuma rizashingira ku mahame mpuzamahanga n’ibimenyetso bya gihanga ku mikorere y’uyu muti. Ishami ry’umuryango w’abibumbye rishinzwe ubuzima ku isi, OMS/WHO, rivuga ko nta muti riremeza ko uvura Covid-19. Ubuvuzi bwifashishije ibimera bufite umwanya munini ku ndwara muri Afurika, ibi na OMS irabyemera ariko ikaburira abantu kuri uwo muti, mu gihe isi yose ikeneye umuti wa coronavirus. OMS ivuga ko bikwiye ko uyu muti ubanza gusuzumwa no kugeragezwa mu buryo bwa gihanga, ikabwira abantu ko biteye impungenge kwizera imiti idapimye. Leta ya Madagascar ivuga ko uyu muti wapimwe kandi ukageragezwa n’abahanga b’iki gihugu mbere yo kwemezwa. Perezida Andry Rajoelina yatangaje ko mu cyumweru gitaha bazatangira no kugerageza urukingo narwo rushingiye ku kimera uyu muti ukozemo. Umugabane wa Afurika umaze kubonekaho abantu barenga 45,000 banduye Covid-19 n’abandi hafi 2,000 imaze kwica.
