Ku itariki nk’iyi ya 12 Gicurasi mu 1994, Abatutsi babarirwa mu magana bari barahungiye kuri ADEPR Nyabisindu iherereye mu murenge wa Nyamabuye mu karere ka Muhanga, bagabweho igitero simusiga cyasize abiganjemo abagore n’abakobwa bishwe Urw’agashinyaguro.
Inyandiko ya Komisiyo y’igihugu yo kurwanya Jenoside (CNLG), igaragaza ko ubwicanyi bugitangira ku wa 23 Mata mu 1994 muri Gitarama, kuri ruriya rusengero hari harahungiye impunzi zari zaraturutse imihanda itandukanye y’igihugu. Muri zo harimo izaturutse muri Kivuye na Nyacyonga n’andi makomoni ya Perefegitura ya Byumba yaberagamo intambara, zaje zihahurira n’izari zaraturutse mu bice bitandukanye bya Gitarama na Kibilira. Byabaye ngombwa ko impunzi z’Abahutu n’iz’Abatutsi zivangurwa, bikozwe na Pasiteri Sagahutu wayoboraga ADEPR Nyabisindu n’undi mugore bafatanyije kubarura impunzi, umwe abarura Abahutu undi abarura Abatutsi. Komisiyo ivuga ko impunzi z’Abahutu bari baturutse i Byumba n’i Kigali zashyizwe ukwazo ahantu heza, ndetse zikanareba nabi Abatutsi. Izi mpunzi ngo ni na zo zazanaga ibitero byicirwagamo Abatutsi buhoro buhoro, kugeza ku munsi wa nyuma babarimbura bose. Mbere y’uko Abatutsi bicirwa kuri ADEPR Nyabisindu, ngo habanje kuza Perefe Ukurikiyeyezu wa Gitarama, wari kumwe na Misago Rutegesha wari Superefe, Antoine wari Visi-Perezida wa mbere w’ishyaka CDR ku rwego rw’igihugu na Pasiteri Nyandwi Enok wari umuyobozi wa ADEPR. Basaba impunzi kujya ahitwa Misizi ngo bazazihicire kubera ko hari kure y’umuhanda hanitaruye Umujyi. Mu gihe cyo kwimura impunzi bazishoreje abicanyi bari bitwaje intwaro gakondo, maze impunzi zigeze mu mujyi wa Gitarama zivumbagatanya zanga kujya mu Misizi, ahubwo zirwana zerekeza i Kabgayi. Icyo gihe bamwe barishwe abandi bashobora kugera i Kabgayi n’ubwo abenshi bahise bahava bagasubira kuri ADEPR nyuma yo gushyirwa ahazwi nka CND Kabgayi hari habi cyane. Ku itariki nk’iyi mu myaka 26 ishize, interahamwe zisize ingwa zinambaye amashara ziraye mu Batutsi n’intwaro gakondo zitandukanye zirabica. Mu kwica Abatutsi zasize abagore n’abakobwa, kugira ngo zizabanze kubasambanya ku gahato. Mu kubahohotera hakoreshejwe ibikoresho binyuranye bibabaza, birimo amacupa, ibiti bisongoye ndetse n’imyanana y’insina. Kuri ADPR Nyabisindu hari urwibutso rushyinguwemo abahaguye 121 babashije kuboneka.
2 Responses
Kwibuka26: Abatutsi bahungiye kuri ADEPR Nyabisindu bishwe urw’agashinyaguro
Yesu mbega ko numva ari hatar c gus muje muduha amateka natwe tubashe kuyamenya
Kwibuka26: Abatutsi bahungiye kuri ADEPR Nyabisindu bishwe urw’agashinyaguro
Yesu mbega ko numva ari hatar c gus muje muduha amateka natwe tubashe kuyamenya