Minisiteri y’Ubuzima muri Uganda yatangaje ko kuri uyu wa 31 Gicurasi 2020, abaganga n’abakozi bakora mu nzego z’ubuzima barindwi basuzumwe bagasanga baranduye Covid-19 muri bo babiri bakaba ari aba dogiteri.
Mu itangazo iyi minisiteri isohoye kuri uyu mugoroba ivuga ko aba bakozi barindwi bayo banduye Covid-19 ari abaforomo batatu, abadogiteri babiri, n’abandi bakozi babiri bari mu nzego zo hejuru mu buyobozi bw’iyi minisiteri bakaba bajyanywe kuvurirwa mu bitaro bya Entebbe n’ibya Mulago.
Itangaza ko muri aba barindwi, 3 muri bo bagaragaye mu bipimo byafashwe ku munsi w’ejo naho abandi 4 bakaba bagaragaye mu bipimo by’uyu munsi.
Aba batumye umubare w’abarwayi ba Covid-19 muri iki gihugu wiyongera ugera kuri 417, muri bo 72 bamaze gukira basezererwa mu bitaro mu gihe nta n’umwe wari wicwa nayo.
Raporo yo muri Mata y’ishami ry’Umuryango w’Abibumbye ryita ku buzima yagarazaga ko kuva Coronavirus yagaragara bwa mbere mu Bushinwa, abaganga n’abakozi bakomeye b’inzego z’ubuzima basaga 22,000 bo mu bihugu 52 ku Isi bari baranduye iki cyorezo, ahanini bitewe no kwita ku barwayi bacyo buri munsi.
N’ubwo kugeza ubu nta mibare igezweho y’abaganga bamaze kwandura no guhitanwa n’iki cyorezo, Uganda yiyongereye mu bihugu bike ku Isi byagiye bitangaza ko abaganga babyo banduye, abandi bakaba bari mu kaga ko kwandura.
