Abakinnyi ba Rayon Sports, bamwe mu bafana ndetse n’ubuyobozi bw’iyi kipe kuri uyu wa Gatatu; basuye Urwibutso rwa Jenoside yakorewe Abatutsi rwa Ntarama mu karere ka Bugesera, bunamira imibiri y’Abatutsi barushyinguyemo.
Abagize iyi kipe bari bayobowe na Perezida wayo, Capt (Rtd) Uwayezu Jean Fidèle cyo kimwe na Sadate Munyakazi wahoze ayiyobora.
Urwibutso rwa Jenoside rwa Ntarama Rayon Sports yasuye, ni rumwe mu nzibutso mu gihugu zifite amateka yihariye bitewe n’uburyo Jenoside yakorewe Abatutsi yakozwemo.
Uru rwibutso rwubatse mu yahoze ari kiliziya Gatolika ya Ntarama yiciwemo abantu barenga 5,000 ku wa 15 Mata 1994, rukaba mu cyiciro kimwe n’Urwibutso rwa Murambi rw’i Nyamagabe, Urwa Jenoside rwa Kigali ruri ku Gisozi, urwa Nyamata mu Bugesera, urwa Bisesero rw’i Karongi ndetse n’urwa Nyarubuye rwo mu karere ka Kirehe.
Izi nzibutso uko ari esheshatu zagizwe na UNESCO izisigasiye umurage w’Isi.
Abakinnyi ba Rayon Sports bashyize indabo ku mva rusange ishyinguwemo imibiri mu rwego rwo guha icyubahiro abashyinguye muri ruriya rwibutso.
Ni na ko byagenze ku batoza ba Rayon Sports bari bayobowe n’umutoza mukuru Jorge Paxiao bafashe umunota wo kwibuka no gushyira indabo ku mva, mu rwego rwo guha icyubahiro Abatutsi bashyinguye ku rwibutso rwa Ntarama.
Amafoto: @Rayon Sports
