Imikino y’umunsi wa nyuma wa Shampiyona y’Abongereza yakinwe kuri iki cyumweru, yasize ikipe ya Manchester United na Chelsea zisanze mu myanya ine ya mbere izemerera gukina UEFA Champions league, mu gihe Leicester City yisanze muri UEFA Europa league.
Ni umunsi wakinwe hibazwa ikipe imwe igomba kwerekeza muri Europa League, dore ko byari bigishoboka ko imwe mu makipe ya Manchester United yari iya gatatu ku rutonde rwa shampiyona, Chelsea ya kane na Leicester City ya gatanu hagira ikipe imwe ibura itike ya Champions league.
By’umwihariko Manchester United yagombaga kwisobanura na Leicester City yarushaga inota rimwe, mu gihe Chelsea yanganyaga na Man United amanota yo yagombaga gukora ibishoboka byose igatsinda Wolves kugira ngo yizere kurangiza mu myanya ine ya mbere.
Manchester United yakoze akazi gakomeye ko kujya gutsindira Leicester City iwayo ibitego 2-0, birimo icya Bruno Fernandes kuri Penaliti ndetse n’icya Jesse Lingard cyo mu minota ya nyuma y’umukino.
Ni na ko byagenze ku kipe ya Chelsea kuko na yo yatsinze Wolvermpton ibitego 2-0. Ibitego byo gice cya mbere cy’umukino bya Mason Maunt na Olivier Giroud byari bihagije kugira ngo iyi kipe y’umutoza Frank Lampard yizere itike ya UEFA Champions league itaha.
Muri rusange umunsi wa 38 wa Shampiyona y’Abongereza wasize Liverpool yegukanye igikombe n’amanota 99, Manchester iza ku mwanya wa kabiri n’amanota 81, iya gatatu iba Manchester United n’amanota 66 inganya na Chelsea ya kane.
Ayo makipe uko ari ane ni yo azahagararira Ubwongereza muri UEFA Champions league.
Icyo gihugu kandi kizahagararirwa muri UEFA Europa league n’amakipe ya Leicester City na Tottenham, mu gihe Arsenal yarangije shampiyona iri ku mwanya wa munani isabwa gutsinda Chelsea ku mukino wa nyuma wa FA Cup kugira ngo izakine Europa league.
Mu gihe Chelsea yaba itsinze Arsenal, byaha amahirwe ikipe ya Wolverhampton yarangije shampiyona ku mwanya wa karindwi yo gukina Europa ariko yabanje guca mu ijonjora.
Umunsi wa nyuma wa Shampiyona y’Abongereza kandi usize amakipe ya AFC Bournemouth, Watford na Norwich City ari yo yisanze mu kiciro cya kabiri.
