Mu ijoro ryo kuri uyu wa gatanu, haramenyekana ikipe imwe hagati ya FC Barcelona yo muri Espagne na Bayern Münichn yo mu Budage, yiyongera kuri abiri yamaze gukatisha itike ya 1/2 cy’irangiza mu mikino ya UEFA Champions league ikomeje kubera i Lisbon mu gihugu cya Portugal.
Mu ijoro ryakeye ikipe ya Leipzig yo mu Budage yateye intambwe ya 1/2 cy’irangiza cya UEFA Champions league, nyuma yo gusezerera Atletico de Madrid yo muri Espagne yatsinze ibitego 2-1, yiyongera kuri PSG yo mu Bufaransa, na yo yateye iriya ntambwe nyuma yo gutsinda Atalanta yo mu Butaliyani ibitego 2-1.
Umukino utegerejwe n’Isi yose urahuza FC Barcelona na Bayern Münichn, amakipe rukumbi asigaye muri UEFA Champions league yarashoboye kwegukana igikombe cy’iri rushanwa. Ni umukino utangira saa tatu z’ijoro ku isaha y’i Kigali.
Ni umukino by’umwihariko amakipe yombi ahuriramo, buri imwe ishaka gukomeza urugendo ruyiganisha kuri UEFA Champions league ya gatandatu, dore ko zombi zatwaye ibikombe bitanu.
FC Barcelona ni yo iheruka gutwara igikombe cy’iryo rushanwa vuba, dore ko igiheruka mu myaka itanu ishize nyuma yo gutsinda ku mukino wa nyuma Juventus ibitego 3-1.
Muri iyo myaka itanu ishize ni bwo Barcelona inaherukira guhurira na Bayern Münichn muri UEFA Champions league, dore ko yari yayisezereye muri 1/2 cy’irangiza iyitsinze ku giteranyo cy’ibitego 5-3.
Bayern Münichn ku rundi ruhande, yo iheruka UEFA Champions league mu myaka irindwi ishize, nyuma yo gutsinda ku mukino wa nyuma Borussia Dortmund ibitego 2-1.
Icyo gihe ikipe ya Bayern yari yasezereye muri 1/2 cy’irangiza FC Barcelona bahura muri iri joro, iyinyagiye ibitego 7-0 mu mikino yombi.
Abakinnyi bitezwe ku mpande zombi:
Messi v Lewandowski
Lionel wa FC Barcelona na Robert Lewandowski ku ruhande rwa FC Bayern Münichn, ni bo bakinnyi bahanzwe amaso n’abakunzi b’ariya makipe yombi.
Nyuma yo kwitwara neza muri Shampiyona y’Abadage agatsindira Bayern ibitego 33, Robert Lewandowski aza no kwisonga ry’abakinnyi bahetse iriya kipe mu mikino ya UEFA Champions, dore ko amaze kuyitsindira ibitego 13 n’imipira itatu yavuyemo ibitego yatanze.
Messi ku rundi ruhande nyuma yo kurangiza Shampiyona ya Espagne ayoboye abatsinze ibitego byinshi (25), ahanzwe amaso cyane n’abakunzi ba FC Barcelona amaze gutsindira ibitego birindwi muri UEFA Champions league ndetse n’imipira icyenda yavuyemo ibitego amaze gutanga.
Ter Stegen Vs Neuer
Uretse Messi na Lewandowski bahanzwe amaso muri uyu mukino, abandi bahanzwe amaso ni abazamu, Manuel Neuer wa Bayern na Marc-Andre Ter Stegen wa FC Barcelona.
Bombi ni abazamu b’Abadage, by’umwihariko bakaba bapingana kubera kurwanira umwanya w’ugomba kubanza mu kipe y’igihugu. Umukino wo muri iri joro urerekana niba koko Manuel Neuer ari we ugomba gukina mu izamu ry’Abadage cyangwa Ter Stegen ari we ukwiye uwo mwanya.
Amakuru avugwa mu makipe yombi
FC Barcelona irakina uyu mukino yagaruye Sergio Busquets na Artulo Vidal batagaragaye mu mukino wa Napoli kubera amakarita, cyo kimwe na Ousmane Démbélé wari umaze igihe kirekire yaravunitse.
Umukinnyi wa FC Barcelona utagaragara kuri uyu mukino ni Samuel Umtiti ufite ikibazo cy’ivi, mu gihe Bayern Munich ibura Bénjamin Pavard na we wavunitse ivi.
Ibyatangajwe n’impande zombi
Mu kiganiro n’itangazamakuru ku munsi w’ejo, umutoza Quique Setien wa FC Barcelona yavuze ko bafite icyizere cy’uko bashobora gusezerera Bayern Munich, gusa agashimangira ko ari ikipe ikomeye cyane.
Ati: “Cyane, turemera ko bishoboka. Twese tuzi ubushobozi bw’ikipe duhanganye, imibare yabo n’ubushobozi bwabo, ni ubushobozi budasanzwe, ariko natwe turi tayari. Ndatekereza ko umukino uzaba uringaniye, ukazashingira ku gushaka ibindi bisubizo. Ni byinshi twavuga kuri uyu mukino.”
Umutoza Setien yavuze ko Bayern azi neza ko ari ikipe igira igitutu cyinshi kandi ikugarira neza, gusa ashimangira ko kuyima umupira ari byo bishobora kugabanya ibitero byayo ndetse bakaba banayitsinda.
Mugenzi we Hansi Flick utoza ikipe ya Bayern Munich, aheruka gutangaza ko Lionel Messi atari we mukinnyi wenyine Bayern ihanze amaso, ko ahubwo Barça ifite abandi bakinnyi batari Messi bashobora kugutsinda isaha n’isaha.
11 bashobora kubanza mu kibuga ku mpande zombi
FC Barcelona: Ter Stegen, Gerard Pique, Clement Lenglet, Nelson Semedo, Jordi Alba, Sergio Busquets, Frenkie de Jong, Artulo Vidal, Sergi Roberto, Luis Suarez na Lionel Messi.
Bayern Müninchn: Neuer, Joshua Kimmich, Jérôme Boateng, David Alaba, Alphonso Davies, Leon Goretska, Kingsley Coman, Thomas Müeller, Serge Gnabry na Robert Lewandowski.
