Bamwe mu banyamuryango b’Ishyirahamwe ry’Umupira w’Amaguru hano mu Rwanda, FERWAFA, binubiye uburyo iri shyirahamwe ryasaranganyije abanyamuryango baryo inkunga yatanzwe na FIFA mu rwego rwo kubafasha guhangana n’ingaruka za Covid-19.
Ku munsi w’ejo ku wa Gatatu ni bwo FERWAFA yatangaje uburyo $1,000,000 yatanzwe na FIFA azasaranganywa mu banyamuryango bayo, mu rwego rwo kubafasha guhangana n’ingaruka za Covid-19.
Nk’amakipe yo mu cyiciro cya mbere yagenewe miliyoni 28 z’Amafaranga y’u Rwanda kuri buri imwe, ayo mu cyiciro cya kabiri agenerwa 10, ay’abari n’abategarugori asanzwe ari abanyamuryango ba FERWAFA agenerwa miliyoni eshanu, mu gihe amakipe y’abari n’abategarugori ariko atari abanyamuryango ba FERWAFA yagenewe miliyoni enye.
Uretse amakipe y’umupira w’Amaguru, abandi banyamuryango ba FERWAFA na bo hari amafaranga bagiye bagenerwa.
Mu batishimiye uburyo ariya mafaranga yasarangayijwe harimo Ijabo ryawe Rwanda, ihuriro ry’ibigo byigisha umupira w’amaguru mu Rwanda.
Iri huriro ryagenewe na FERWAFA angana na miliyoni ebyiri n’igice z’Amafaranga y’u Rwanda, agomba kurifasha guhangana n’ingaruka Covid-19 yateje.
Perezida wa Ijabo Ryawe Rwanda, Sheikh Habimana Hamdan, yavuze ko bitumvikana ukuntu ikipe itari umunyamuryango wa FERWAFA yahabwa miliyoni enye bo bagahabwa ebyiri n’igice.
Ati: “Iyo rero bafata Ijabo ryawe Rwanda bakarigenera miliyoni ebyiri n’igice, bagafata ikipe yo mu cyiciro cya mbere bakayiha miliyoni 28, bagafata indi kipe itari n’umunyamuryango bakayirutisha umunyamuryango bakayiha miliyoni enye, twabonye y’uko harimo ikibazo tugomba kubaza. Ntabwo dufatwa kimwe nk’abanyamuryango.”
Sheikh Habimana waganiraga na Radio 10, yavuze ko mu Ijabo ryawe Rwanda hari abanyamuryango benshi akibaza uburyo bo banyamuryango bose barenga 300 bazasaranganywa amafaranga y’u Rwanda miliyoni ebyiri n’igice.
Yavuze ko byanga bikunze bagomba gusobanuza impamvu mu gutanga ariya mafaranga habayemo ubusumbane.
Ati: “Na FIFA iyo igiye kuyatanga ntabwo ivuga ngo duhaye u Bushinwa aya ngaya cyangwa mpaye Nigeria aya, u Rwanda ndaruha aya. Babaha angana kubera ko bose babafata kimwe. Rero biriya bintu uburyo byakozwemo, mu izina ry’Ijabo ryawe Rwanda ntabwo twabyakiriye neza, ndetse tuzanabibaza.”
Umunyamabanga Mukuru wa FERWAFA, Uwayezu François Regis, yasobanuye ko amafaranga bageneye ririya huriro atari ayo gusaranganya abanyamuryango baryo, ngo kuko abenshi mu barigize bafite ibindi byiciro babarizwamo na byo byagenewe amafaranga.
2 Responses
Amafaranga ya FIFA yatangiye guteza umwiryane mu banyamuryango ba FERWAFA
Yewe amafaranga azakora kuri mwene Adam! Uretse ko n’ubundi kuba haragaragayemo ubusumbane atari byiza! Mbona muri buri ruhande rwari guhabwa angana kuko iyi covid 19 nta we itagizeho ingaruka!
Amafaranga ya FIFA yatangiye guteza umwiryane mu banyamuryango ba FERWAFA
Yewe amafaranga azakora kuri mwene Adam! Uretse ko n’ubundi kuba haragaragayemo ubusumbane atari byiza! Mbona muri buri ruhande rwari guhabwa angana kuko iyi covid 19 nta we itagizeho ingaruka!