Inama y’Abaminisitiri yateraniye muri Village Urugwiro ku wa Gatatu tariki ya 26 Kanama iyobowe na Perezida wa Repubulika, Paul Kagame, yahaye imirimo mishya abarimo Assistant Commissioner of Police (ACP) Nkuranga Lynder wabaye Umuvugizi Wungirije wa Polisi y’Igihugu.
ACP Nkuranga wakoze imirimo itandukanye muri Polisi y’u Rwanda, yagizwe Umuyobozi Ushinzwe Iperereza ryo hanze y’Igihugu mu rwego rw’Igihugu Rushinzwe Iperereza n’Umutekano (NISS).
Uretse kuvugira Polisi y’igihugu nk’umwungiriza wa CP Theos Badege, ACP Nkuranga Lynder yanabaye Umuyobozi w’Ishami Rishinzwe Ubutwererane no Kwakira Abashyitsi muri Polisi y’u Rwanda, anakora mu kigo Isange One Stop Center nk’Umuyobozi ushinzwe kurwanya ihohoterwa rikorerwa abagore n’abana (GBV).
Uretse ACP Nkuranga wahawe imirimo n’Inama y’Abaminisitiri, abandi bahawe imirimo barimo Col. Kanamugire David wagizwe Umuyobozi Mukuru (CEO) mu Rwego rw’Igihugu Rushinzwe Umutekano w’Ibijyanye n’Ikoranabuhanga mu Itangazabumenyi n’Itumanaho (NCSA).
Colonel Kanamugire yaherukaga kuzamurwa mu ntera muri Nyakanga uyu mwaka akuwe ku ipeti rya Lieutenant Colonel, akaba yari Umuyobozi ukuriye ikoranabuhanga muri Minisiteri y’Ingabo, MINADEF.
Hahawe imirimo kandi Lieutenant Colonel Ngabo Francis wagizwe Umuyobozi Mukuru w’Ikigo gishinzwe iby’Ikirere mu Rwanda (Rwanda Space Agency), ndetse n’abandi bantu batandukanye.
