Kuri uyu wa Kabiri ushize, itariki ya 1 Nzeri 2026, i Bujumbura, Polisi y’u Burundi yeretse itangazamakuru uwitwa Bonheur Dieudonné, ivuga ko ari Umunyarwanda wafatiwe mu burasirazuba bwa Repubulika ya Demokarasi ya Congo azira kuba mu mutwe wa Red-Tabara.
Abayobozi b’u Burundi ngo babona ibi nk’ikindi gihamya gishyigikira ibirego byabo bivuga ko u Rwanda rushyigikiye uyu mutwe witwaje intwaro, bavuga ko ugamije guhungabanya umutekano w’u Burundi no guhirika inzego z’ubutegetsi bwarwo.
Igipolisi cy’u Burundi cyatangaje ko uyu yavutse mu 1999 akaba akomoka mu Murenge wa Mushubi, mu Karere ka Nyamagabe mu Ntara y’Amajyepfo; akaba ari umuhungu wa Nambajimana Euphreum na Mukamwiza Formina.
Ngo yatangaje ko yagiye i Kigali gushaka akazi maze ahura n’umugabo witwa Rwigema, bivugwa ko wamujyanye Kicukiro ahasanga abantu benshi bateraniye mu nzu imwe nk’uko inkuru dukesha Radio na Televiziyo by’u Burundi (RTNB) ivuga.
Nyuma y’icyumweru kimwe, bivugwa ko abantu bagera kuri 50 bajyanywe i Kabuga, aho basanze abandi bagera ku ijana. Nyuma y’ibyumweru bibiri, bivugwa ko iryo tsinda ryimuriwe i Bukavu, hanyuma rikajyanwa i Kaziba nyuma yo guhabwa inkweto za gisirikare.
I Kaziba ni ho bivugwa ko bahuriye n’abarwanyi ba Red-Tabara. Nk’uko bivugwa na Bonheur Dieudonné, nyuma yaho iryo tsinda ryagabweho igitero n’abarwanyi ba Wazalendo. Babonye uko ibintu bimeze, bivugwa ko bamwe bahisemo guhunga.
Ngo bamaze iminsi mu misozi ya Kajinja, mbere yo kwishyikiriza abarwanyi ba Wazalendo, maze aba na bo babashyikiriza Ingabo za Repubulika ya Demokarasi ya Congo, zaje kubashyikiriza ubutegetsi bw’u Burundi.
Pierre Nkurikiye, umuvugizi wa Minisiteri y’Ubutegetsi bw’Igihugu, Iterambere ry’Umuryango n’Umutekano rusange, avuga ko atari ubwa mbere abantu batabwa muri yombi mu burasirazuba bwa Repubulika ya Demokarasi ya Congo (DRC) bazira kugira aho bahuriye n’umutwe wa Red-Tabara.
Avuga ko kuba hari Umunyarwanda mu bantu bagira uruhare mu guhungabanya umutekano w’igihugu ari ikintu gishya cyagaragaye. Kuri we, ibi ni ikindi gihamya cyerekana ko u Rwanda rushyigikira umutwe wa Red-Tabara.
Nkurikiye kandi ashinja u Rwanda guha imyitozo ya gisirikare n’iy’imikoreshereze y’intwaro abantu binjiye muri uwo mutwe. Byongeye kandi, uwo muvugizi avuga ko muri Red-Tabara habamo itsinda rigizwe n’Abarundi n’Abanyarwanda, rifite intego yo guhungabanya umutekano w’u Burundi no guhirika inzego z’ubutegetsi hakoreshejwe imbaraga. Avuga by’umwihariko Alexis Sinduhije na Bob Rugurika nk’abantu bafite aho bahuriye n’uwo mutwe.
