Perezida wa Repubulika Iharanira Demokarasi ya Congo, Félix Tshisekedi, yagiranye ibiganiro na Minisitiri w’Intebe wa Israel, Benjamin Netanyahu, ubwo bombi bahuriraga i Yeruzalemu mu ruzinduko rwibanze ku gukomeza ubufatanye mu by’umutekano, ubwirinzi n’ikoranabuhanga rihanitse.
Perezidansi ya RDC yatangaje ko Tshisekedi yahuye na Netanyahu ku wa 1 Nzeri 2026, aho ibiganiro byabo byibanze ku mutekano, igisirikare, ubuhinzi, ibikorwa remezo, ingufu n’ikoranabuhanga rihanitse.
Impande zombi kandi zagaragaje ubushake bwo kurushaho gukomeza ubufatanye bwazo.
Ibi bibaye mu gihe RDC iri mu rugamba rwo kongera ubushobozi bw’ingabo zayo, cyane cyane mu bijyanye no guhangana n’ibibazo by’umutekano bikomeje kugaragara mu burasirazuba bw’igihugu.
Amakuru avuga ko kimwe mu byo Tshisekedi ashobora kuba yarashakaga muri Israel ari ibikoresho bya gisirikare bigezweho ndetse n’ikoranabuhanga ryo kurinda ikirere, ariko kugeza ubu nta tangazo rya Kinshasa cyangwa Yeruzalemu ryemeje ko hari amasezerano y’intwaro cyangwa sisitemu y’ubwirinzi bw’ikirere yasinywe muri uru ruzinduko.
Gusa ingingo zashyizwe ku murongo w’ibiganiro zigaragaza ko ubufatanye mu by’umutekano n’ikoranabuhanga rya gisirikare bushobora kuba mu byo Kinshasa ishaka guteza imbere mu mubano wayo na Israel.
Perezidansi ya RDC yavuze ko izi nzego ziri mu z’ingenzi ku iterambere no ku “busugire” bw’igihugu.
Israel n’ubushobozi bwo kurinda ikirere
Israel ni kimwe mu bihugu bizwi cyane ku isi mu ikoranabuhanga ry’ubwirinzi bw’ikirere, radar, misile n’uburyo bwo guhangana n’ibitero bya drone.
Mu gihe Tshisekedi yari i Yeruzalemu, Israel yari imaze iminsi isinyanye n’u Bugereki amasezerano ya miliyari €3 yo kubaka uburyo bw’ubwirinzi bw’ikirere buzwi nka Achilles Shield.
Muri ubwo buryo harimo David’s Sling, SPYDER, BARAK MX, radar za MMR ndetse na Drone Dome yo guhangana n’ibitero bya drone.
Ibi ntibisobanura ko RDC iri kugura izo sisitemu, ariko bigaragaza urwego rw’ikoranabuhanga Israel ishobora gutanga mu gihe igihugu runaka gishaka kongera ubushobozi bwo kurinda ikirere no guhangana n’ibitero bya misile cyangwa drones.
Tshisekedi ashyira igisirikare ku murongo w’ingenzi
Uru ruzinduko ruje nyuma y’iminsi mike Tshisekedi atangaje ko RDC igomba kugira “amahame y’igisirikare mpuzamahanga” mashya ashingiye ku kongera ubushobozi bwo guteganya no gukurikirana ibibazo by’umutekano, ubusugire mu ikoranabuhanga ndetse no gushaka ibisubizo bya Afurika ku bibazo by’umutekano.
Bityo, ibiganiro bye na Netanyahu bishobora gufatwa nk’igice cy’imbaraga za Kinshasa zo gushaka abafatanyabikorwa bashobora kuyifasha mu kongera ubushobozi bwa gisirikare n’ikoranabuhanga.
Tshisekedi kandi yagiranye ibiganiro na Perezida Isaac Herzog, aho impande zombi zagaragaje ko zifuza gushyira umubano wa RDC na Israel ku rwego rushya, harimo ubufatanye mu buhinzi, amazi, ubuzima, ikoranabuhanga, umutekano, amahugurwa n’ishoramari.
Uruzinduko rwa Tshisekedi muri Israel rero rubaye mu gihe Kinshasa iri gushaka kongera ubushobozi bwayo mu by’umutekano, mu gihe n’intambara yo mu burasirazuba bwa RDC ihanganyemo na AFC/M23 ikomeje gushyira igisirikare n’ikoranabuhanga mu by’ingenzi kuri gahunda ya Leta.
