Kuri uyu wa Kane, itariki ya 10 Nzeri 2026, muri Gurupoma ya Kisimba muri Teritwari ya Walikale, Intara ya Kivu y’Amajyaruguru, imirwano ikaze yamaze amasaha menshi ibera hafi y’imisozi ya Mindjendje hagati y’inyeshyamba za AFC/M23 n’ingabo za Leta (FARDC) zifashwa n’inyeshyamba za Wazalendo.
Nk’uko bitangazwa n’ikinyamakuru ACTUALITE.CD, iyi mirwano yatangiye ahagana saa kumi n’imwe za mu gitondo (5:00 a.m.), kandi ikoreshwamo indege zitagira abapilote.
Muri iyo mirwano, biravugwa ko ingabo za Leta zatakaje ibirindiro byazo bya Mindjendje, mu gace ka Banakindi muri Gurupoma ya Kisimba, bifatwa n’inyeshyamba za AFC/M23. Abatanze amakuru bavuga ko ubu izo nyeshyamba ari zo zigenzura ibyo birindiro.
Aba bakomeza bavuga ko hari impungenge z’uko inyeshyamba za AFC/M23 zakomeza kwegera imbere zivuye muri ibyo birindiro, zerekeza ahitwa Pinga, imwe muri centre z’ingenzi muri iyo gurupoma no muri zone y’ubuvuzi ya Pinga.
Kugeza ubu, biragoye kumenya uko ibintu byifashe muri Pinga mu buryo bw’ako kanya kuko imiyoboro y’itumanaho itarasubizwaho, ibyo bikaba bigora kubona no kugenzura amakuru aturuka muri ako gace ka Walikale.
