Senateri Espérance Nyirasafari yasabye abaturage bahana imbibi n’umupaka wa Repubulika ya Demokarasi ya Congo bo mu Karere ka Rubavu, mu Ntara y’Uburengerazuba, gukomeza kuba maso no kwirinda ingengabitekerezo ya Jenoside ikomeje kugaragara mu baturanyi, hakurya y’umupaka.
Ibi Senateri Nyirasafari yabitangaje muri iki cyumweru dusoza mu nama y’Inama Njyanama y’Akarere ka Rubavu agaragaza ibyagezweho by’ingenzi mu nshingano za 2021-2026 mu gihe manda y’imyaka itanu y’inama njyanama igiye kurangira.
Senateri Nyirasafari yagize ati: “Kuba duturanye na Congo Kinshasa icumbikiye FDLR, atari nk’umutwe w’ingabo gusa ahubwo nk’umutwe witwaje intwaro w’abajenosideri bivuze ko tugomba gukomeza kuba maso. Benshi mu bayigize bakoze ibyaha muri Jenoside yakorewe Abatutsi mu 1994 mbere yo guhunga, kandi abifatanya nabo bakorera mu ngengabitekerezo imwe.”
Yakomeje agira ati: “Tugomba gushishikariza abaturage bacu kwanga ikintu cyose gishobora guteza imbere iyo ngengabitekerezo no kuyikumira ngo idakwirakwizwa.”
Mu kiganiro yagiranye n’abitabiriye iyi nama ku kibazo cy’umutekano, Major General Eugène Nkubito, Umuyobozi wa Diviziyo ya 3 mu Ntara y’Iburengerazuba, yagaragaje ibibazo by’umutekano biterwa n’imitwe yitwaje intwaro kandi aburira abaturage bo ku mipaka abasaba kwirinda kwambuka imipaka mu buryo butemewe n’amategeko.
