Ubucuruzi rusange bwa EAC bwageze kuri miliyari 52.3 z’amadolari y’Amerika, bukaba bwariyongereyeho 37% ugereranije n’igihembwe cya kabiri cya 2025 nk’uko bigaragara mu itangazo rigenewe abanyamakuru ryashyizwe ahagaragara n’Umuryango wa EAC.
Ibicuruzwa byoherezwa mu mahanga byazamutseho 41.3% bigera kuri miliyari 26.3 z’amadolari ya Amerika, mu gihe ibicuruzwa biva mu mahanga byiyongereyeho 32.9% bigera kuri miliyari 26.0 z’amadolari ya Amerika, bituma habaho inyungu mu bucuruzi ingana na miliyari 0.3 z’amadolari.
Ibicuruzwa byoherezwa mu mahanga ku masoko ya Afurika byiyongereyeho 44.3% bigera kuri miliyari 7.2 z’amadolari ya Amerika, mu gihe ibyoherejwe hagati muri EAC byiyongereyeho 33.2% bigera kuri miliyari 3.2 z’amadolari ya Amerika.
U Bushinwa bwakomeje kuba igihugu cya mbere cyoherezwamo ibicuruzwa byinshi biva mu karere kandi kiba n’icya mbere gitumizwamo ibicuruzwa byinshi. Ibicuruzwa byoherezwa mu Bushinwa byikubye hafi kabiri bigera kuri miliyari 10.7 z’amadolari ya Amerika, mu gihe ibicuruzwa byatumijwe mu Bushinwa byazamutse bigera kuri miliyari 7.1 z’amadolari ya Amerika.
UAE na Afurika y’Epfo nabyo biri mu bihugu bya mbere byoherezwamo ibicuruzwa byinshi biva mu karere, mu gihe u Buhinde, UAE, Arabia Saou
dite, Leta Zunze Ubumwe za Amerika n’u Buyapani nabyo ari bimwe mu bihugu bya mbere bitumizwamo ibicuruzwa byinshi byinjira muri EAC.
