Rayon Sports yasabye Ferwafa kwisubira ikemeza ko ari yo izasohokera u Rwanda muri CAF Confederation Cup

Ikipe ya Rayon Sports kuri uyu wa Gatanu, yandikiye Ishyirahamwe ry’umupira w’amaguru mu Rwanda, Ferwafa, isaba ko yahindura umwanzuro yafashe ku ikipe zizasohokera u Rwanda mu mikino nyafurika.

Ibi bikubiye mu ibaruwa Rayon Sports yandikiye komite nyobozi ya Ferwafa.

Rayon Sports yasabye Ferwafa kwisubira, mu gihe tariki 31 Nyakanga 2020 Inama ya Komite Nyobozi ya Ferwafa yateranye ikemeza ko Ikipe ya AS Kigali ari yo izahagararira u Rwanda muri CAF Confederation ya 2020/21.

Bimwe mu byashingiweho Ferwafa yemeza ko AS Kigali ari yo izaserukira u Rwanda, harimo ko mu ngingo ya kabiri y’amategeko y’Igikombe cy’Amahoro cya 2020, agace ka gatatu, havuga ko ‘ikipe izegukana irushanwa ariyo izakina CAF Confederation Cup y’umwaka utaha.’

Icya kabiri cyashingiweho ni ukuba amabwiriza ya CAF Confederation Cup yemejwe na Komite Nyobozi ya CAF ku wa 19 Nyakanga 2019, agomba gukurikizwa, akaba yemeza ko ikipe yegukanye igikombe cy’Igihugu ari yo yitabira iri rushanwa.

Ingingo ya kane y’ayo mabwiriza, mu gace ka gatandatu, ivuga ko ‘mu gihe habaye impamvu ituma irushanwa ry’igihugu ridakinwa, federasiyo y’icyo gihugu ifite uburenganzira bwo kohereza ikipe yatwaye irushanwa riheruka.

Hagendewe kuri izo ngingo, Komite Nyobozi ya Ferwafa yemeje ko AS Kigali yatwaye Igikombe cy’Amahoro cya 2019 ariyo izakina CAF Confederation Cup ya 2020/21 kuko irushanwa rya 2020 ritigeze riba.

Mu ibaruwa Rayon Sports yanditse yasinyweho na Perezida wayo, Munyakazi Sadate, yasabye Ferwafa guhindura umwanzuro wafashwe na Komite nyobozi yayo, kuko ngo ari umwanzuro basanga wararenganyije ikipe ya Rayon Sports.

Muri iyi baruwa, Rayon Sports ihamya ko amategeko agenga umupira w’amaguru mu Rwanda adateganya uko byagenda mu gihe imikino runaka itarangiye, ari na yo mpamvu ngo hakozwe inama y’amakipe yo mu cyiciro cya mbere kugira ngo haganirwe kuri icyo kibazo.

Muri iyo nama ngo amakipe menshi yemeje ko Shampiyona n’igikombe cy’amahoro bisozwa bitarangiye maze ikipe ya APR FC yari ku mwanya wa mbere ikazasohokera u Rwanda mu makipe yabaye aya mbere iwayo, naho Rayon Sports ikazasohokera u Rwanda mu makipe yatwaye ibikombe iwayo (CAF Confederation Cup).

Uuyobozi bwa Rayon Sports bwavuze ko bwatunguwe no kumva ko hemejwe ko AS Kigali ari yo izasohokera u Rwanda mu marushanwa ya CAF Confederation Cup hagendewe ku itegeko rivuga ko iyo nta gikombe cyabaye, hasohoka ikipe yari igifite umwaka ushize.

Rayon Sports yagize iti:”Dushingiye kuri ibyo , tuributsa ko igikombe cy’Amahoro mu mwaka wa 2019-2020 cyakinwe ndetse kikagera muri 1/8 kiza guhagarara kubera icyorezo cya Covid1-19, ndetse natwe twari tukirimo bitandukanye n’itegeko mwagendeyeho rya Caf riteganya igihe kitakinwe.”

Ku bwa Rayon Sports, Ferwafa ntiyari gufata umwanzuro yemeza ko kitakinwe, bityo ikaba isanga nkuko mu kugena ikipe izasohokera u Rwanda mu makipe yabaye aya mbere iwayo Ferwafa itavuze ko Shampiyona itabaye, ahubwo ikaba yarabaye igasozwa mbere y’imikino yose. Rayon Sports yifuza ko ku gikombe cy’Amahoro hemezwa ko cyakinwe ariko ntikirangire, maze hagafatwa umwanzuro hagendewe ku nama yatanzwe n’abanyamuryango bemeje ko ikipe yabaye iya kabiri aba ari yo isohokera igihugu muri CAF Confederation Cup.

Iti: “Niba mwemeje ko imikino ihagarara nkuko mwabyemeje n’amarushanwa twarimo yose agasozwa mbere y’igihe, turasaba ko icyo gihe hazasohoka ikipe yari iya mbere ku rutonde rwa Shampiyona igasohokera u Rwanda mu mikino y’amakipe yabaye aya mbere iwayo, ikipe yari iya kabiri yazasohokera u Rwanda mu makipe yatwaye ibikombe iwayo nkuko byifujwe n’abanyamuryango mu nama yaduhuje.”

Yunzemo ivuga ko kuba Ferwafa yaremeje ko ikipe izasohokera u Rwanda mu makipe yatwaye ibikombe iwayo ari iyatwaye igikombe giheruka cy’Amahoro kuko kitarangiye (saison 2018-2019), ikabishingiraho yemeza ko hazasoka AS de Kigali, ubwo iryo tegeko ryanakubahirizwa ku ikipe izasohokera u Rwanda mu makipe yabaye aya mbere iwayo kuko na Shampiyona itarangiye, bityo Rayon Sports yatwaye igikombe cya shampiyona muri 2017/18 igasimbura APR FC.

Ubuyobozi bwa Rayon Sports bwavuze ko impamvu butajuriye mbere hose ari uko ubwo AS Kigali yemezwaga ’ hari ibibazo byinshi mu ikipe’ bityo ko ubu ariwo mwanya mwiza babonye wo gusaba Ferwafa kwisubira ku cyemezo cyayo.