Paul Rusesabagina yagaragaye imbere y’ubushinjacyaha

Kuri uyu wa Gatatu tariki ya 09 Nzeri, ubushinjacyaha bw’u Rwanda bwashyikirijwe dosiye ya Paul Rusesabagina bunatangira kumubaza ku byaha akurikiranweho nyuma yo kubwitaba.

Ni nyuma yo gufatirwa yo gufatirwa ku kibuga Mpuzamahanga cy’indege cya Kigali ku cyumweru tariki ya 30 Kanama, akerekanwa n’Urwego rw’Igihugu rw’Ubugenzacyaha bukeye bwaho.

Rusesabagina akurikiranweho ibyaha birimo iterabwoba, gutwika, ubushimusi n’ubwicanyi byakorewe abaturage b’inzirakarengane, akaba ari byo yatangiye kubazwaho n’ubushinjacyaha bw’u Rwanda.

Ni ibyaha byakorewe mu duce turimo Nyabimata mu Karere ka Nyaruguru, ahabaye ibitero muri Kamena 2018 no mu nkengero za Nyungwe mu Karere ka Nyamagabe mu Ukuboza 2018, byose byigambwe n’umutwe witwara gisirikare wa FLN, ushamikiye ku mpuzamashyaka MRCD Rusesabagina yari ayoboye.

Rusesabagina yitabye ubushinjacyaha ku kicaro cyabwo kiri ku Kimihurura aherekejwen’abanyamategeko be Emeline Nyembo na David Rugaza.

Biteganyijwe ko nyuma yo kunoza dosiye, Ubushinjacyaha buzayiregera urukiko mu gihe kitarenze iminsi itanu nk’uko amategeko abiteganya, bityo urubanza rwe rugatangira kuburanishwa mu mizi.