Messi yongeye guhigika Cristiano Ronaldo ayobora urutonde rw’abakinnyi 100 bakomeye ku Isi

Umunya-Argentine, Lionel Messi, yongeye gukubita incuro Cristiano Ronaldo bahora bahanganye ayobora urutonde rw’abakinyi bakomeye muri uyu mwaka mushya, FIFA 21, buri mwaka rushyirwa hanze n’ikigo cya EA Sports ku bufatanye n’Ishyirahamwe ry’Umupira w’Amaguru ku Isi (FIFA).

Uru rutonde rwashyizwe ahagaragara kuri uyu wa Kane, rugaragaza ko Lionel Messi ari we mukinnyi uhagaze neza kurusha abandi ku Isi n’amanota 93, akaba yatakaje inota rimwe ugereranyije n’uko yari ahagaze ubwo yari ayoboye urwo mu mwaka ushize.

Umunya-Portugal, Cristiano Ronaldo wa Juventus ari ku mwanya wa kabiri na 92, akaba akurikiwe n’Umunya-Pologne, Robert Lewandowski ukinira Bayern Munich wa gatatu n’amanota 91.

Uru rutonde rukorwa hashingiwe ku bushobozi bw’umukinnyi n’uko yitwara mu kibuga hagendewe ku mwanya akinaho.

Ku bakinnyi bataha izamu, harebwa ibitego atsinda, imipira ivamo ibitego aha bagenzi be, uburyo arema imbere y’izamu bushobora kubyara ibitego, ubuhanga bwo gucenga, imbaraga akoresha n’ibindi bitandukanye.

Kuri ba myugariro, harebwa imipira yambuye abakinnyi bahanganye, imipira yo mu kirere yatanze abandi bakinnyi n’ubundi buryo bushobora gutuma agaragara nk’umukinnyi mwiza w’inyuma.

Abatoza batandukanye, abashakira amakipe abakinnyi babigize umwuga n’abafana bazwiho kureba imikino myinshi itandukanye, bose hamwe bagera ku 9,000 ni bamwe mu bitabazwa mu gutanga amanota agenderwaho hakorwa uru rutonde.

Amanota aba bakusanyije, ashyikirizwa abayasuzuma bagera kuri 300, bareba mu bice 35 bitandukanye, buri mukinnyi agahabwa amanota hagendewe ku ijanisha.

Urutonde rw’abakinnyi 10 rw’uyu mwaka rugaragaramo abakinnyi batari bagaragaye ku rw’urushize, barimo nk’umunya-Sénégal, Sadio Mané, Lewandowski na Klian Mbappé.

Abakinnyi basohotse mu myanya 10 ya mbere ugereranyije n’umwaka ushize ni Eden Hazard na Luka Modric ba Real Madrid, cyo kimwe n’umuzamu Marc-Andre Ter Stegen wa FC Barcelona.

Abakinnyi 10 ba mbere muri FIFA 21:

1. Lionel Messi – FC Barcelone: 93

2. Cristiano Ronaldo – Juventus: 92

3. Robert Lewandowski- Bayern Munich: 91

4. Kevin De Bruyne – Manchester City: 91

5. Neymar Jr.- Paris Saint-Germain: 91

6. Jan Oblak – Atlético de Madrid: 91

7. Virgil van Dijk – Liverpool: 90

8. Kylian Mbappé – Paris Saint-Germain: 90

9. Mohamed Salah – Liverpool: 90

10. Sadio Mané – Liverpool: 90