Ikipe ya Liverpool yanganyije na Everton ibitego 2-2, mu mukino wa shampiyona y’Abongereza iyi kipe y’umutoza Jurgen Klopp yabujijwemo amanota atatu n’ikoranabuhanga rya VAR.
Liverpool yari yasuye Everton ku kibuga Goodison Park giherereye mu gace ka Merseyside, mu mujyi wa Liverpool amakipe yombi atuyemo. Hari mu mukino w’umunsi wa gatanu wa shampiyona.
Umunota wa gatatu wari uhagije kugira ngo Umunya-Senegal, Sadio Mané afungurire amazamu Liverpool, gusa Everton iza kwishyura icyo gitego ku munota wa 19 ibifashijwemo na myugariro Michael Keane.
Igice cya mbere cy’uyu mukino warimo ishyaka no gusatirana ku mpande zombi cyarangiye amakipe yombi ari kugwa miswi igitego 1-1.
Liverpool yatangiye igice cya kabiri cy’umukino iri hejuru cyane, iza kubona igitego cya kabiri ku munota wa 72 ibifashijwemo n’Umunya-Misiri, Mohamed Salah wuzuzaga ibitego 100 amaze kuyitsindira.
Byasabye iminota umunani yonyine ngo Everton y’umutoza Carlo Anchelotti yishyure icyo gitego ibifashijwemo na rutahizamu Calvert-Lewin. Ni ku mupira yari ahinduriwe na myugariro Lucas Digne, awutereka mu izamu n’umutwe.
Mu minota ya nyuma y’umukino Liverpool yashoboraga kubona igitego cya gatatu cyari gitsinzwe na Kapiteni Jordan Henderson wari uhawe umupira na Sadio ManĂ©, gusa umusifuzi Michael Oliver yemeza ko hari habayeho kurarira nyuma yo kwiyambaza VAR.
Abenshi mu bakunzi b’umupira w’amaguru bahurije ku kuba Liverpool yakabaye yahawe kiriya gitego, kuko Sadio ManĂ© washinjwe kurarira yari ku murongo umwe na ba myugariro babiri ba Everton.
Iyi Derby ya Merseyside yarangiye amakipe yombi anganya ibitego 2-2, yagaragayemo ikarita itukura yeretswe umunya-BrĂ©sil, Richarlison, nyuma yo gukinira nabi Thiago Alcantara ku munota wa 83 w’umukino.
Myugariro Virgil van Dijk na we ntiyarangije uriya mukino, nyuma yo gukinirwa nabi n’umuzamu Jordan Pickford wakabaye yerekwa ikarita itukura.
Inota Everton yakuye kuri Liverpool ryatumye ikomeza kuyobora urutonde rwa shampiyona y’Abongereza n’amanota 13, mu gihe Liverpool ari iya gatatu by’agateganyo n’amanota 10.
