Abashinzwe kugenzura imiti muri Leta zunze ubumwe za Amerika, bemeje burundu umuti urwanya virusi wa remdesivir nk’ugiye kuvurishwa abarwayi ba Covid-19 bari mu bitaro, mu gihe Ishami ry’Umuryango w’Abibumbye ryita ku buzima (OMS) riherutse gutangaza ko uriya muti nta bushobozi bwo kuvura ufite.
Ikigo cy’Amerika gishinzwe ubuziranenge bw’imiti n’ibiribwa (FDA) cyavuze ko uyu muti, wahawe izina rishya rya Veklury, ukaba ugabanyaho iminsi itanu igihe bifata ngo abarwayi boroherwe, nkuko byagaragajwe n’amagerageza yawo.
Itangazo FDA yasohoye, rivuga ko uwo muti wemejwe ejo ku wa kane ngo “ukoreshwe ku barwayi bakuru n’abana b’imyaka 12 no hejuru yayo kandi bapima ibiro bitari munsi ya 40 mu kubavura Covid-19 bicyeneye ko bashyirwa mu bitaro”.
Stephen Hahn uyobora FDA yavuze ko bemeje uriya muti bagendeye ku makuru yavuye mu magerageza menshi kiriya kigo cyagenzuye bikomeye kandi, akemeza ko ari intambwe y’ingenzi muri siyansi bateye mu gihe cya COVID-19.
FDA yavuze ko umwanzuro wo kwemeza uriya muti wafashwe hagendewe ku isesengura ry’amakuru yavuye mu magerageza atatu yakozwe mu buryo bwo gutomboza ku barwayi ba Covid-19 bashyizwe mu bitaro barimo abarembye n’abarwaye byoroheje.
OMS yari ryavuze ko umuti wa remdesivir ufite akamaro kari hagati ya gacye na busa ku gukira k’umurwayi, ikabishingira ku bushakashatsi bwayo bwite yakoze.
Remdesivir ni umwe mu miti ine OMS yasuzumye ngo irebe niba ifite ubushobozi bwo kuvura COVID-19, gusa isanga ubushobozi bw’iyo miti ari hafi ya ntabwo.
Indi miti yasuzumwe harimo uwa hydroxychloroquine wa malaria, lopinavir na ritonavir igabanya ubukana bwa Virusi itera SIDA.
Iyi miti ine yageragejwe ku barwayi bakuze 11,266 bo mu bitaro 500 byo mu bihugu birenga 30 ku isi, gusa ibyavuye mu bushakashatsi byerekana ko itavura COVID-19, n’ubwo ibyavuye mu bushakashatsi bwa OMS bitaragenzurwa n’abandi bashakashatsi.
Kuva muri Gicurasi uyu mwaka remdesivir yari yemewe gukoreshwa muri Amerika nk’umuti w’amaburakindi gusa, ikaba by’umwihariko yarifashishijwe mu kuvura Perezida Donald Trump wari wanduye COVID-19 mu minsi ishize.
Kugeza ubu muri Amerika harabarurwa abantu barenga miliyoni 8,4 banduye Covid-19, muri bo abarenga 220,000 yarabishe nkuko imibare ya Kaminuza ya Johns Hopkins ibigaragaza.
