Inkuru ikomeje kuvugwa mu bitangazamakuru byo muri Repubulika Iharanira Demokarasi ya Congo, iravuga ko Colonel Rugema Emmanuel wari umuyobozi w’Umutwe wa RUD-Urunana ushamikiye ku wa FDLR-FOCA urwanya ubutegetsi bw’u Rwanda, aherutse kwicirwa i Rutshuru muri Kivu y’Amajyaruguru.
Televiziyo ya MNCTV Congo yavuze ko umwe mu basirikare bakomeye bakorera i Rutshuru wemeje iyi nkuru, yavuze ko Colonel Rugema yishwe ku kagambane ka bagenzi be barimo Col. Faida na Cpt. Gavana barwaniraga ubuyobozi bwa RUD-Urunana kuva Gen. LĂ©on Mpiranya uzwi nka Kagoma yicwa muri Kanama uyu mwaka.
Mpiranya uyu yari yasimbuye ku buyobozi bwa RUD-Urunana Gen. Jean Michel Africa wishwe na FARDC ku wa 09 Ugushyingo 2019.
Amakuru avuga ko Col. Rugema yiciwe mu giturage cya Katwiguru ku wa Gatatu tariki ya 21 Ukwakira. Ni amakuru yanemejwe na Sosiyete Sivile ikorera i Rutshuru, gusa ntiyagira byinshi ivuga kuri ruriya rupfu.
Colonel Rugema si we muyobozi ukomeye wa RUD-Urunana na FDLR ishamikiyeho wishwe, kuko kuva ingabo za Repubulika Iharanira Demokarasi ya Congo zatangiza ibitero simusiga byo guhiga imitwe ikorera mu Burasirazuba bwa Congo Kinshasa, iriya mitwe yatakaje abakomanda n’abarwanyi benshi.
Abakomeye bamenyekanye barimo Gen. Sylivestre Mudacumura wayoboraga inyeshyamba za FDLR, wishwe arasiwe n’abakomando ba FARDC i Rutshuru muri Kivu y’Amajyaruguru, mu rukerera rw’itariki ya 18 Nzeri umwaka ushize.
Abandi barimo Gen. LĂ©on Mpiranya uzwi nka Kagoma, wiciwe ahitwa Makoka mu gace ka Binza ku wa 27 Kanama uyu mwaka, cyo kimwe na Gen. Jean Michel Africa wari umukuru wa RUD-Urunana wishwe nyuma y’amezi abiri.
Umutwe wa RUD-Urunana niwo wagize uruhare mu bitero byagabwe mu murenge wa Kinigi uri muri 15 igize akarere ka Musanze bigahitana ubuzima bw’abaturage 14. Abarwanyi bawo 19 bishwe n’ingabo z’u Rwanda, abandi batanu bafatwa mpiri.
