FARDC yigaruriye ibirindiro by’inyeshyamba z’i Burundi, yica izikabakaba 30

Igisirikare cya Repubulika Iharanira Demokarasi ya Congo, FARDC, cyatangaje ko kigaruriye ibirindiro bikuru by’inyeshyamba za FNL z’i Burundi biherereye ahitwa Naombe muri Teritwari ya Mwenga ho muri Kivu y’Amajyepfo, kinica abenshi muri abo barwanyi cyo kimwe n’abo mu yindi mitwe.

Umuvugizi wa FARDC muri Kivu y’Amajyepfo, Capt Dieudonné Kasereka, yatangaje ko ingabo zigaruriye biriya birindiro nyuma y’imirwano ikomeye yari imaze itatu iminsi izisakiranya na ziriya nyeshyamba.

Ati: “Byari saa cyenda n’igice ubwo ingabo zigaruriraga ibirindiro by’inyeshyamba za FLN ziyobowe na Aloise Nzabampema.”

Saa cyenda n’igice Capt Kasereka yavugaga n’izo mu rukerera rw’ejo ku Cyumweru. Umuvugizi wa FARDC muri Kivu y’Amajyepfo yanavuze ko Igisirikare cyarwaniye n’inyeshyamba za CNRD mu byaro bya Kahungwe, Kanga na Rugezi biri mu kibaya cya Ruzizi.

Iyi mirwano yasize ingabo za Repubulika Iharanira Demokarasi ya Congo zishe abarwanyi babarirwa muri 27, ikaba yaratangiye ku wa 04 Nzeri ubwo FARDC yatangizaga ibitero simusiga byo guhiga imitwe yitwaje intwaro, nk’uko Capt Dieudonné Kasereka yabitangaje.

Yagize ati: “Nyuma y’iminsi 50 hatangijwe ibi bikorwa byo guhashya imitwe ya Red Tabara, FNL hamwe n’ibisigisigi bya CNRD n’indi mitwe yitwaje intwaro yo muri kiriya gice, FARDC yamaze kwigarurira ahantu henshi.”

“Harimo nk’imisozi ya Kitavugambere na Finda muri Gurupoma ya Kigoma cyo kimwe n’uduce twa Namaramara, Nabombi na Nandjale muri Gurupoma ya Basimukinje muri Teritwari ya Itombwe. Igisirikare kandi cyirukanye inyeshyamba zo mu Burundi mu birindiro bikuru byazo mu mudugudu wa Naombe.”

Capt Kasereka yavuze abasirikare batatu ba Repubulika Iharanira Demokarasi ya Congo ari bo baguye muri iriya mirwano, mu gihe abandi bane bakomeretse.

Yavuze ko Général de brigade Gaby Boswane, Umuyobozi wa Operasiyo Sokola 2 igizwe n’ingabo za Repubulika Iharanira Demokarasi ya Congo zishinzwe guhashya imitwe yitwaje intwaro muri Kivu y’Amajyepfo, ahamagarira abaturage bo mu bice bya Fizi, Mwenga na Uvira gufatanya n’ingabo mu kwerekana ubwihisho by’inyeshyamba, kugira ngo zibashe guhashywa.