Amakipe ya FC Barcelona, Juventus, Chelsea na Sevilla FC; yakatishije itike ya 1/8 cy’irangiza cya UEFA Champions league nyuma yo kwitwara neza mu mikino y’amatsinda y’iri rushanwa.
Mu ijoro ryakeye hakinwaga imikino ya kane yo kuva mu tsinda rya gatanu kugeza mu rya munani.
FC Barcelona idafite abarimo Lionel Messi na Frenkie de Jong bari baruhukijwe, yari yasuye Dynamo Kyev mu gihugu cya Ukraine, ihatsindira ibitego 4-0.
Ni ibitego byose byinjiye mu gice cya Kabiri cy’umukino bitsinzwe na Sergiño Dest, Martin Braithwaite watsinze bibiri n’agashinguracumu ka Antoine Griezmann winjiye mu kibuga asimbura.
Mu gihe hakibura imikino ibiri, FC Barcelona iyoboye itsinda F n’amanota 12/12, ikaba irusha atatu Juventus iyikurikura.
Iyi kipe yo mu gihugu cy’Ubutaliyani yo yari yakiriye ku kibuga cyayo Ferencvaros muri Hongria, iyitsinda ibitego 2-1.
Igitego cya Cristiano Ronaldo na Arvalo Morata byari bihagije ngo Juventus igere muri 1/8 cy’irangiza cya Champions league, gusa yo na Barcelona zikaba zigomba kwishakamo izayobora itsinda.
Andi makipe yageze muri 1/8 ni Chelsea yo mu Bwongereza na Sevilla yo muri Espagne zombi zihuriye mu tsinda E.
Chelsea yari yasuye Rennes mu Bufaransa, itsindirayo bigoranye ibitego 2-1. Ni ibitego bya Callum Hodson-Odoi na Olivier Giroud wahesheje Chelsea insinzi yo mu minota ya nyuma.
Sevilla ku rundi ruhande yari yasuye Krasnodar mu gihugu cy’Uburusiya, ihatsindira ibitego 2-1.
Ni ibitego yatsindiwe na Kapiteni Ivan Rakitic ndetse na Munir El Hadadi wayihesheje insinzi mu minota itatu y’inyongera yari ishyizwe ku mukino.
Ariya makipe ashobora kwiyongeraho andi arimo Bayern Munich yo mu Budage na Liverpool na Manchester City zo mu Bwongereza, mu gihe yaba atsinze imikino afite kuri uyu wa Gatatu.
Mu ijoro ryakeye Manchester United yanyagiye Instanbul Basaksehir yo muri Turkiya ibitego 4-1, gusa ntibyari bihagije kuko igomba gutegereza umukino wa gatanu w’itsinda uzayihuza na Leipzig.
Ni na ko bimeze kuri PSG n’amakipe arimo Real Madrid na Inter Milan.
