Ikipe ya Al Ahly yo mu gihugu cya Misiri, yahojeje amarira umufana wayo wagaragaye arira ubwo iyi kipe yasezererwaga muri CAF Champions league ya 2018, inyagiwe na Mamelodi Sundowns yo muri Afurika.
Umukino ubanza wari wabereye i Pretoria, Mamelodi Sundowns y’umutoza Pitso Mosimane kuri ubu utoza Ahly, yawutsinze ku bitego 5-0, mu gihe uwo kwishyura wabereye i Cairo Alhy yawutsinze ku gitego 1-0, ihita isezererwa.
Ubwo umukino wo kwishyura wari ugeze ku munota wa 65 amakipe anganya 0-0, umwe mu bafana ba Al Ahly wari muri Stade y’i Cairo yagaragaye kuri televiziyo arira nk’uruhinja, bijyanye n’uko yabonaga ikipe ye itagifite amahirwe yo kugera muri ½ cy’irangiza cya Champions league.
Al Ahly ku munsi w’ejo ubwo yishimiraga ibikombe bitatu yatwaye muri uyu mwaka, uyu mufana ni umwe mu b’imena iyi kipe yari yatumiye, mu rwego rwo kumuhoza amarira yatewe n’iriya kipe yihebeye.
