Umuhanzi Ngabo Medard Jobert uzwi mu muziki Nyarwanda nka ‘Meddy’, yashyize hanze indirimbo yise ‘Carolina’ yahise itangira gukundwa n’abatari bake.
Mu ntangiriro z’Ukwakira ni bwo uyu muririmbyi uri mu bayoboye umuziki nyarwanda yatangiye kurarikira abakunzi be Iyi ndirimbo, ku buryo ab’inkwakuzi bahise batangira kuyishakishiriza kuri Internet bazi ko yamaze kuyisohora.
Mu gitondo cyo kuri uyu wa Kane ni bwo iyi ndirimbo nshya ya Meddy yagiye hanze, ahita anasohora amashusho yayo.
Mu gihe cy’amasaha indirimbo ‘Carolina’ imaze ku rubuga rwa YouTube, imaze kurebwa n’abasaga ibihumbi 56, barimo abarenga ibihumbi 21 bari bamaze kuyireba mu gihe cy’amasaha abiri.
Muri iyi ndirimbo Meddy agaruka ku nkuru y’umukobwa witwa Carolina aba asaba urukundo, akamwizeza kumuhindurira ubuzima no kumuha urukundo bikamucanga mu gihe yaba arumwemereye.
Yungamo ati: “Call me on your calendar, Baby love you are my agenda, I’ll take you to Kigali, I go show you my people.”
Amashusho y’indirimbo ‘Carolina’ yafatiwe ahantu mu butayu, igaragaramo itsinda ry’ababyinnyi benshi. Ni amashusho yayo yafashwe anatunganywa na Lick Lick usanzwe ukorana n’uyu muhanzi. Amajwi yayo yatunganyijwe na Element muri Country Record.
Carolina igiye hanze ikurikira ‘We don’t care’ uyu muhanzi yaherukaga gukorana n’abahanzi bo muri Tanzania barimo Rj the Dj na Rayvanny.
Meddy asanzwe afite izindi ndirimbo zabiciye bigacika nka ‘Slowly’ imaze kurebwa kuri YouTube n’abarenga miliyoni 40, Ntawamusimbura, All Night, Nasara, Burinde bucya n’izindi.
