Ikipe ya AS Kigali yegukanye amanota atatu ya mbere muri shampiyona y’ikiciro cya mbere, nyuma yo gutsinda Mukura VS ibitego 2-0.
Hari mu mukino w’umunsi wa gatatu wa shampiyona iyi kipe y’Umujyi wa Kigali yari yakiriye iyi kipe y’i Huye i Nyamirambo, ukaba uwa mbere yari ikinnye bijyanye n’uko itari yashoboye gukina ibiri ya mbere kubera ko yari ihagarariye u Rwanda muri CAF Confederation Cup.
Ibitego by’Umunya-Nigeria, Orotomal Alexis na Shaban HusseinTchabalala, byari bihagije kugira ngo iyi kipe y’umutoza Eric Nshimiyimana yegukane amanota atatu iyakuye kuri Mukura.
Ni Mukura itaratsinda umukino n’umwe muri itatu ya shampiyona imaze gukina, kuko bwa mbere yatsinzwe na Kiyovu Sports ibitego 3-1, mbere yo kugwa miswi na Sunrise 0-0 ku munsi wa kabiri wa shampiyona.
Mu yindi mikino yabaye: Musanze FC yagiye gutsindira Etincelles i Rubavu ibitego 2-1, mu gihe AS Muhanga yaguye miswi na Gorilla FC 0-0.
