Abanyarwanda ba mbere bazatangira guhabwa urukingo rwa COVID-19 muri 2021

Minisitiri w’Ubuzima, Dr Daniel Ngamije, yatangaje ko u Rwanda ruri mu bihugu byamaze gusaba urukingo rwa COVID-19, bikaba biteganyijwe ko Abanyarwanda ba mbere bazarwakira hagati ya Werurwe na Mata mu mwaka utaha.

Minisitiri Ngamije yabigarutseho kuri uyu wa kane, mu kiganiro yagiranye na Radio Rwanda, aho yavuze ko Abanyarwanda bangana na 20% ari bo bazahita bahabwa ruriya rukingo ku ikubitiro.

Ati: “U Rwanda rwamaze gusaba guhabwa urukingo rwa COVID-19. Duteganya ko ku ikubitiro hazakingirwa abantu babarirwa kuri 20%. Biteganyijwe ko urukingo rwa COVID-19 rushobora kugera mu Rwanda mu mpera za Werurwe cyangwa mu ntangiriro za Mata 2021.”

Mu kiganiro Minisitiri w’Ubuzima yagiranye n’itangazamakuru ku wa 02 Ukuboza ari kumwe n’abayobozi mu nzego zitandukanye, yari yasobanuye ko ku ikubitiro urukingo rwa COVID-19 ruzahabwa abantu bafite indwara zituma iyo hajemo na covid-19 bashobora guhita bapfa, n’abantu bakuze bafite imyaka 65 kuzamura.

Abandi bazazihabwa mu ba mbere barimo abakora akazi gatuma bahura n’abantu benshi bikabashyira mu byago byo kwandura iyo ndwara, urugero nk’abashoferi bambukiranya imipaka, abo mu nzego z’umutekano kuko usanga akazi kabo kabahuza n’abantu benshi mu gihe bapima, basaka cyangwa bagenzura imizigo y’abantu.

Dr Ngamije avuga ko uko abakingirwa bazaba benshi ari ko bizafasha mu guhashya icyorezo kuko bizatuma kitabasha gukwirakwira mu bantu.

Magingo aya hari inkingo zigeze ku munani zirimo gukurikiranwa by’umwihariko n’ikigo mpuzamahanga gikurikirana ikwirakwizwa ry’inkingo ku isi cyitwa GAVI, zirimo ebyiri zigeze ku cyiciro cyo gutangwa mu bantu.

U Rwanda rurateganya kwakira inkingo za COVID-19 mu mwaka utaha, mu gihe hari ibihugu by’inkwakuzi byatangiye kuziha abaturage bazo.

Nko ku wa Kabiri w’iki cyumweru, Umukecuru w’imyaka 90 witwa Margaret Keenan yabaye umuntu wa mbere mu Bwongereza wahawe urukingo rwa COVID-19, rukaba rumwe muri doze 800,000 z’urukingo rw’ibigo Pfizer na BioNTech zigiye gutangwa mu Bwongereza mu byumweru biri imbere.