Rutahizamu w’Ikipe y’igihugu’Amavubi’, Meddie Kagere, yeseje umuhigo wo gutsinda ibitego 50 muri shampiyona ya Tanzania nyuma y’imyaka ibiri n’igice amaze ayikinamo.
Kagere yatsinze igitego cya 50 mu mukino w’ikirarane cya shampiyona ya Tanzania (Tanzania Vodacom Premier League) wahuzaga Simba SC akinira na KMC FC ikinamo Mugiraneza J. Baptiste.
Igitego cyo kuri Penaliti yo ku munota wa 77 cya Meddie Kagere ni cyo cyatandukanyije impande zombi.
Kagere yahise yuzuza ibitego 50 muri shampiyona ya Tanzania yagezemo mu mpeshyi ya 2018 avuye muri Gormahia yo muri Kenya.
Mu bitego 50 amaze gutsinda, 28 yabitsindishije akaguru k’iburyo, 14 abitsindisha umutwe mu gihe ibindi umunani yabitsinze akoresheje akaguru k’ibumoso.
Mugiraneza Jean Baptiste “Miggy” yabanje mu kibuga nk’uko bisanzwe nk’umukinnyi KMC igenderaho anaba umukinnyi w’umukino “Man of the Match”.
Kagere yaje mu kibuga mbere y’uko igice cya kabiri gitangira asimbuye Kapiteni wa Simba SC, John Raphael Bocco.
Simba SC iri ku mwanya wa kabiri n’amanota 29 mu mikino 13 mu gihe Yanga SC iri ku mwanya wa mbere n’amanota 37 mu mikino 15 imaze gukina. KMC FC iri ku mwanya wa gatanu n’amanota 21 mu mikino 13 imaze gukina.
