Perezida watowe wa Leta zunze ubumwe za Amerika, Joe Biden, yahawe urukingo rwa Pfizer rukingira COVID-19, mu rwego rwo kwereka abaturage b’igihugu cye ko ntacyo rutwaye ku buzima.
Biden yahawe ruriya rukingo nyuma y’abandi bategetsi barwakiriye, barimo barimo Visi Perezida Mike Pence na Nancy Pelosi uyobora Inteko Ishing Amategeko, umutwe w’abadepite.
Biden yaherewe urukingo mu mujyi wa Newark muri leta ya Delaware ejo ku wa Mbere.
Nyuma yo gukingirwa yagize ati: “Ndimo gukora ibi kugira ngo nereke abantu ko bakwiye kwitegura igihe urukingo ruzaba rubagezeho ngo barufate. Nta kintu na kimwe gihari cyo kugirira impungenge”.
Joe Biden yunzemo ko ubutegetsi bwa Perezida Trump bukwiye gushimirirwa gahunda y’igihugu y’ikingira bwatangije.
Kamala Harris, wiyamamaje hamwe na Biden akaba ari Visi Perezida watowe, ndetse n’umugabo we Doug Emhoff, bo biteganyijwe ko bazakingirwa bwa mbere mu cyumweru gitaha.
Itsinda ry’abazakorana bya hafi na Biden ku butegetsi bwe, ryihaye intego yuko Abanyamerika miliyoni 100 bazaba bamaze guhabwa urukingo rwa Covid-19 mu minsi 100 ya mbere y’ubutegetsi bwabo.
Magingo aya muri Amerika harabarurwa abantu barenga miliyoni 18 banduye coronavirus, muri bo abarenga 319,000 ikaba yarabishe, nkuko imibare ya Kaminuza ya Johns Hopkins ibigaragaza.
Urukingo rwa COVID-19 muri kiriya gihugu rwatangiye gutangwa ku Cyumweru, hakaba habarurwa abarenga 500,000 bamaze kurufata.
Cyakora cyo abo barimo Perezida Donald Trump uri mu bategetsi bakomeye bake batarahabwa ruriya rukingo, n’ubwo mu minsi yashize yigeze kumara iminsi itatu mu bitaro arwaye COVID-19.
Mu butumwa Trump yanditse kuri Twitter ku wa 13 Ugushyingo, yagize ati: “Ntabwo nagize gahunda yo gufatiraho urukingo, ariko mfite amashyushyu yo kubikora mu gihe gikwiye”.
Bamwe mu bajyanama be baramushyigikiye ku gucyerererwa gukingirwa, bavuga ko akirinzwe n’ubwirinzi bwavuye ku miti yahawe agakira kiriya cyorezo ubwo yari akirwaye.
