Umurinzi wa Robert Kyagulanyi uzwi nka Bobi Wine yishwe kuri iki cyumweru na ho abanyamakuru babiri barakomereka, nyuma y’ubushyamirane bwahuje abashyigikiye uriya mugabo wiyamamariza kuyobora Uganda n’abashinzwe umutekano.
Bobi Wine kuri Twitter yavuze ko uwo murinzi we witwa Francis Senteza yapfuye azize ibikomere yakomoye ku ikamyo ya Military Police yamugonze, yungamo ko yishwe agerageza gutwara umunyamakuru witwa Kasirye Ashraf wakomerekeye mu mirwano yahuje Polisi n’abamushyigikiye.
Leta ya Uganda ntacyo iratangaza ku byo Bobi Wine wari wagiye kwiyamamariza mu gace ka Rubaga, gusa ku bijyanye n’ikomereka rya bariya bariya banyamakuru barimo n’uwa Televiziyo ya NTV, Polisi yavuze ko bakomeretse ubwo yageragezaga gutatanya abatezaga imvururu.
Abategetsi ba Uganda bakomeje kotswa igitutu n’Imiryango Mpuzamahanga iharanira uburenganzira bwa buntu irimo na Humana Rights Watch, bashinjwa guhonyora uburenganzira bwa muntu.
Itabwa muri yombi ry’umunyamategeko witwa Nicholas Opiyo ryabaye mu ntangiriro z’iki cyumweru riri mu byongereye igitutu kuri Leta ya Uganda, ishinjwa guhohotera abakozi b’Imiryango Mpuzamahanga, Impirimbanyi z’uburenganzira bwa muntu, abanyamakuru ndetse n’abanyapoliyiki batavuga rumwe na yo.
Amatora y’umukuru w’Igihugu muri Uganda ateganyijwe tariki ya 14 Mutarama.
