CAF CL: Simba ya Kagere yanyagiye FC Platinum igera mu matsinda, Gor Mahia irasezererwa

Ikipe ya Simba Sports Club yo mu gihugu cya Tanzania, yakatishije itike iyijyana mu matsinda ya CAF Champions league, nyuma yo kunyagira ibitego 4-0 FC Platinum yo muri Zimbabwe.

Iyi kipe isanzwe ikinamo Umunyarwanda, Medie Kagere, yari yakiriye abanya-Zimbabwe mu mukino wo kwishyura w’ijonjora rya kabiri wabereye kuri Stade yitiriwe Nyakwigendera Benjamin Mkapa i Dar es Salaam, nyuma y’ubanza yari yatsindiwemo igitego 1-0 i Harare.

Igitego cyo kuri penaliti yo ku munota wa 39 w’umukino cya Erasto Nyoni, ni cyo cyatandukanyije amakipe yombi mu minota 45 ya mbere y’umukino.

Ni igice cyihariwe cyane b’ikipe ya Simba yabaga iri ku izamu rya Platinum buri kanya.

Simba Sports Club yakinnye umupira wo hejuru mu gice cya kabiri, yatsinze igitego cya kabiri ku munota wa 62 ibifashijwemo na myugariro Shomari Kapombe, Kapiteni John Rafael Bocco atsinda icya gatatu ku munota wa mbere w’inyongera mbere y’uko umunya-Zambia Clatous Chota Chama atsinda agashinguracumu ku munota wa 94.

Gutsinda uyu mukino byatumye Simba igera mu matsinda ya CAF Champions league yaherukagamo mu 2018.

Mu gihe Simba yageraga mu matsinda, Ikipe ya Gor Mahia yo mu gihugu cya Kenya yo yasezererwaga na CR Belouizdad yo muri Algeria iyitsinze ku giteranyo cy’ibitego 8-1.

Umukino ubanza Gor Mahia yari yanyagiriwe i Algies ibitego 6-0, mu gihe mu wo kwishyura wabereye i Nairobi na bwo iyi kipe yahatsindiwe ibitego 2-1.