Agatsiko k’abasirikare bahiritse Alpha Condé ku butegetsi bwa Guinée Conakry, kamwemereye gusohoka igihugu ku nshuro ya mbere kuva kamuhiritse.
Itangazo ryasomewe kuri Televiziyo y’Igihugu ejo ku wa Gatanu rivuga ko Condé yemerewe kujya hanze y’igihugu mu rwego rwo gukurikirana ubuzima bwe.
Agatsiko kamuhiritse ku butegetsi muri Nzeri umwaka ushize kavuze ko atagomba kurenza ukwezi kumwe ari hanze y’igihugu.
Muri Nzeri 2021 ni bwo Alpha Condé yahiritswe ku butegetsi n’agatsiko ka gisirikare kari kayobowe na Col Mamadi Doumbouya kuri ubu uyoboye Guinée mu buryo bw’inzibacyuho, muri Coup d’etat yamaganiwe kure n’ibihugu byo muri Afurika y’Uburengerazuba.
Condé w’imyaka 83 y’amavuko yahiritswe ku butegetsi yari amazeho imyaka irenga 10, ashinjwa kutagira icyo akora ku bukene na ruswa byiyongeraga umunsi ku wundi mu gihugu.
