Urugereko rwashinzwe kurangiza imanza zasizwe n’inkiko mpuzamahanga (IRMCT), rwasabye leta ya Niger kuba ihagaritse icyemezo cyo kwirukana Abanyarwanda umunani yari yakiriye barekuwe n’urwo rwego.
Bikubiye mu mwanzuro urwo rwego rwafashe kuri uyu wa gatanu.
Ku wa 27 Ukuboza mu mwaka ushize Leta ya Niger ni bwo yari yahaye bariya Banyarwanda barimo abagizwe abere ku byaha bya Jenoside n’abarangije ibibano bari bakatiwe iminsi irindwi yo kuba bavuye ku butaka bwayo, ku mpamvu yise iza dipolomasi.
Iteka ribirukana ryashyizweho umukono na Minisitiri w’Umutekano w’imbere mu gihugu no kwegereza ubutegetsi abaturage muri Niger, Hamadou Adamou Souley.
Abarebwa n’iri teka ni Zigiranyirazo Protais, Nzuwonemeye François Xavier, Nteziryayo Alphonse, Muvunyi Tharcisse, Ntagerura André, Nsengiyumva Anatole, Mugiraneza Prosper na Sagahutu Innocent.
Biganjemo abahoze ari abanyepolitiki n’abasirikare bakomeye.
Ku wa 05 Ukuboza 2021 ni bwo bari bakiriwe na Leta ya Niger binyuze mu masezerano yagiranye na IMRCT ku wa 15 Ugushyingo 2021.
Inyandiko y’umwanzura usaba Leta ya Niger kutirukana bariya Banyarwanda yashyizweho umukono n’umucamanza mukuru wa IMRCT ishami ryayo rya Arusha, Joseph Masanche Chiondo, ikanagaragaza ko ari we wari washinzwe dosiye ya bariya bantu.
Uyu mwanzuro yabwiye Leta ya Niger ko itagomba kwirukana bariya Banyarwanda hashingiwe ku masezerano impande zombi zagiranye n’ubusabe bariya Banyarwanda bagejeje kuri ruriya rugereko, ndetse n’ingingo ya 28 y’amasezerano ashyiraho IMRCT iteganya ko “Leta z’ibihugu zizakorana na yo kandi zigashyira mu ngiro nta gutinda ibyemezo byafashwe n’umucamanza cyangwa se IMRCT ubwayo.”
Yavuze ko mu rwego rwo kwirinda impaka n’ibibazo bishobora kuvuka mu gushyira mu bikorwa amasezerano impande zombi zagiranye, hakenewe ibiganiro aho Niger ikeneye guhabwa umwanya wo kumvwa ku mpamvu y’icyemezo yafashe cyo kubirukana, dore ko binari mu nyungu z’ubutabera kuba Niger yakwisubira ku cyemezo yafashe kugeza igihe kiriya kibazo kizafatirwaho umwanzuro.
Leta ya Niger yasabwe gutanga ibisobanuro ku mpamvu yirukanye bariya Banyarwanda bitarenze iminsi 30, yirengagije amasezerano yasinye.
Leta y’u Rwanda iheruka kunenga IMRCT ko kuba yaragiranye amasezerano yerekeye bariya Banyarwanda na Niger itabiyimenyesheje, ivuga ko bitanyuze mu mucyo.
