Bobi Wine akomeje kujya mu bibazo kubera imodoka y’akataraboneka aheruka kugurirwa

Umunyapolitiki Robert Kyagulanyi uzwi nka Bobi Wine ukuriye ishyaka ritavugarumwe n’ubutegetsi muri Uganda, ari mu bibazo kubera imodoka itabonana aheruka kugurirwa n’abamushyigikiye.

Ikigo gishinzwe imisoro muri Uganda (URA) kivuga ko amakuru yatanzwe kuri iyi modoka atari yo, ndetse ko yahawe agaciro ko hasi, ibyatumye iki kigo gitumaho iyi modoka ngo yongere ikorerwe igenzura.

Cyakora cyo Bobi Wine yanze gusubizayo iyi modoka kuko kuyitumiza nanone ngo bidakurikije amategeko, nk’uko Daily Monitor dukesha iyi nkuru yabitangaje.

Kyagulanyi yanze gusubiza iyi modoka muri URA abishingiye ku itegeko rivuga ko nta bubasha iki kigo gifite bwo kongera gusuzuma ikintu cyaciye mu bubiko bwacyo kigasuzumwa ngo gisoreshwe imisoro yacyo itangwa nacyo kigahabwa uwasoze.

Iyi modoka iheruka kwinjizwa mu gihugu ariko umwaka ushize yari ibaruye muri Kenya, nyuma yinjizwa muri Uganda iciye ku mupaka wa Busia.

Bobi Wine yatsinzwe amatora ya perezida aheruka, amatora yavuzwe ko yaranzwe n’uburiganya n’urugomo rurimo kwica abo ku ruhande rw’ishyaka rye.

Mu minsi ishize yaretse ikirego yari yaratanze mu rukiko cyo kuburana ku byavuye mu matora aho Perezida Yoweri Museveni yatsindiye manda ya gatandatu.

Mu butumwa yatanze ku mbuga nkoranyambaga tariki 21 z’ukwezi kwa kabiri, Bobi Wine yavuze ko iyo Toyota Land Cruiser y’umutamenwa yayihawe nk’impano n’inshuti ze zimushyigikiye zo muri Uganda no mu mahanga.

Kurikira ibiganiro n’amavidewo binyura kuri Bwiza TV